Makkah defai muahide ke tahat seh mulki committee ka pehla ijlas aaj Istanbul mein hoga

Istanbul mein aaj hone wale ijlas mein Pakistan, Turkiye aur Saudi Arabia ke aala hukkam shareek honge, naib wazir-e-azam Ishaq Dar, wazir-e-difa Khawaja Asif aur Field Marshal Syed Asim Munir Pakistan ki numainda-gi karenge, Turkiye aur Saudi Arabia ke wuzara-e-kharija, wuzara-e-difa aur chiefs of general staff bhi ijlas mein shareek honge.

Naib wazir-e-azam o wazir-e-kharija Ishaq Dar aur Field Marshal Syed Asim Munir Turkiye pahunch gaye hain, ijlas mein Pakistan, Turkiye aur Saudi Arabia ke darmiyan defai o security taawun par aham mushawarat hogi.

Seh mulki ijlas mein aalmi salamati aur teenon mulkon ki defai salahiyatein mazboot banane par ghaur hoga, teenon mulkon mein defai sanat mein mushtarka paidawar aur Technology par baat cheet hogi.

Is silsile mein naib wazir-e-azam Ishaq Dar ki Turkiye ke wazir-e-kharija Hakan Fidan se mulaqat hui hai jis mein Pakistan ne aqlimi aman o istehkam ke liye derpa koshishein jari rakhne ke azm ka aadah kiya aur dotarfa taalluqat ke musalsal istehkam aur tausee par itminan ka izhar kiya.

Naib wazir-e-azam Ishaq Dar ne Hazrat Abu Ayub Ansari ke mazar par hazri di, aqidat o ehtram ka izhar kiya aur Pakistan aur awam ke aman o khushhali, ummat-e-muslima ke ittehad ke liye dua ki.

Wazir-e-azam Shehbaz Sharif ne kaha hai ke Pakistan aur Turkiye ki strategic shirakat-dari mushtarka khushhali aur security ki zamin hai, Makkah muahide ne donon ke strategic bhai-chare ki tasdeeq ki, yeh muahida Pakistan aur Turkiye ko Saudi Arabia ke sath mazbooti se jorta hai, hamare mushtarka tahaffuz aur defai quwwat ki raah hamwar karta hai.