Mahmood Achakzai ka opposition leader ke ohde se mustafi hone se inkar

Islamabad: National Assembly mein opposition leader Mahmood Khan Achakzai ne apne ohde se mustafi hone se inkar kar diya hai.

Tafseelat ke mutabiq woh Pakistan Tehreek-e-Insaf ki aala satah ki committee ke is mubayyana mutalbe par istifa nahin denge jo committee ne hafte ko raat gaye tak jari rehne wale ijlas mein kiya tha.

Aik TV channel ke mutabiq unhon ne guzishta shab der gaye apni Tehreek-e-Bahali-e-Aeen ke ijlas ke baad apne group ke qareebi sathiyon se guftagu mein kaha ke agar Adiala jail mein maujood woh shakhs, jis ne mujhe qaid-e-hizb-e-ikhtilaf namzad kiya tha, mujh se ohda chhorne ka mutalba karega to main mustafi ho jaunga.

Mahmood Achakzai Quetta mein qaim apni jamaat Pashtunkhwa Milli Awami Party ke wahid rukn parliament hain. Unhein rawan saal January mein National Assembly ke speaker ne qaid-e-hizb-e-ikhtilaf muqarrar kiya tha.