Madar-e-watan ka difa muqaddas amanat, sabit qadmi se nibhate rahenge: Air Chief Marshal

Pak Army ke shobe taluqat-e-amma (ISPR) ke mutabiq Youm-e-Shuhada ka aghaz 1965 aur 1971 ki jangon ke shuhada, marka-e-haq ke bahadur shuhada aur qiyam-e-Pakistan se ab tak difa-e-watan ki zimmedariyan nibhate hue jam-e-shahadat nosh karne wale Pak Air Force ke tamam ahalkaron ke isal-e-sawab ke liye khusoosi dua-e-maghfirat aur Quran khwani se hua.

ISPR ke mutabiq Air Headquarters Islamabad mein munaqida Youm-e-Shuhada ki markazi taqreeb ke mehman-e-khusoosi Chief of the Air Staff Air Chief Marshal Zaheer Ahmed Babar Sidhuthe.

Is mauqe par Air Chief ne Pak Air Force ke shuhada ko zabardast khiraj-e-aqeedat pesh karte hue kaha ke un ki azeem qurbaniyan Pak Air Force ki shandar riwayat, jurat, pesha warana maharat aur watan ke difa ke liye ghair mutazalzil azm ki bunyad hain.

Unhon ne kaha ke hamare buzurgon ki shujaat mahaz tareekh ka hissa nahin balke mojooda nasl ke liye aik zinda wirsa hai.

Chief of the Air Staff ka kehna tha ke Pak Air Force ke shuhada jurat, qurbani aur qaumi azm ki lazawal alamat hain, un ki mirath hamein yeh yaad dilati hai ke madar-e-watan ka difa aik muqaddas amanat hai, jise hum sabit qadmi aur bharpoor azm ke sath nibhate rahenge.

ISPR ke mutabiq Air Chief Marshal Zaheer Ahmed Babar Sidhu ne shuhada ki yadgar par phoolon ki chadar charhai aur Pak Air Force ke shuhada ke darjat ki bulandi ke liye fatiha khwani ki.