Khuzdar mein insidad-e-Polio muhim ka aghaz, 90 hazar se zaid bachon ko qatre pilane ka hadaf

Khuzdar: Zila Khuzdar mein insidad-e-Polio muhim ka baqaida aghaz kar diya gaya. Deputy Commissioner Khuzdar Abdul Razzaq Sasoli ne bachon ko Polio se bachao ke qatre pila kar muhim ka iftitah kiya.

Muhim ke dauran zila mein 90 hazar se zaid paanch saal se kam umar bachon ko qatre pilane ka hadaf muqarrar kiya gaya hai, jis ke liye Polio teams mukhtalif ilaqon mein ghar ghar ja kar bachon ko vaccine pilayengi.

Deputy Commissioner ne walidain se apeal ki ke woh paanch saal se kam umar tamam bachon ko Polio ke qatre zaroor pilwayen aur teams se bharpoor taawun karen, kyunke bachon ko is mauzi marz se mehfooz rakhne ke liye vaccine ki har khuraak zaroori hai. Unhon ne hidayat ki ke koi bacha vaccine se mehroom na rahe aur field mein teams ki muassir nigrani yaqeeni banai jaye.

Siyasi, samaji aur qabaili rahnumaon ne bhi muhim ki kamyabi ke liye bharpoor taawun ka yaqeen dilate hue walidain par zor diya ke woh bachon ko barwaqt qatre pilwa kar muashre ko Polio se paak banane mein kirdar ada karen.

Tasveer: Bashukriya DG PR Balochistan