Karan Baloch ki insidad-e-tashaddud-e-itfal ki pehli qaumi hikmat-e-amli 2026–2031 ki taqreeb-e-runumai mein shirkat

Islamabad: Balochistan Commission on the Status of Women (BCSW) ki chairperson Karan Baloch ne wizarat-e-insani huqooq ki dawat par Pakistan ki pehli qaumi hikmat-e-amli barae insidad-e-tashaddud-e-itfal (2026–2031) ki taqreeb-e-runumai mein shirkat ki.

Alami idara-e-Sehat (WHO) aur deegar sharakat daron ke taawun se mutaaruf karai gayi is hikmat-e-amli ka maqsad bachon ko har qism ke tashaddud se mehfooz rakhna, un ke bunyadi huqooq ka tahaffuz yaqeeni banana aur unhein mehfooz mahaul faraham karna hai.

Karan Baloch ne kaha ke bachon ke khilaf tashaddud ka khatma aham qaumi zimmedari hai, jis ke liye hukumat, mutaalliqa idaron, civil society aur muashre ke tamam tabqaat ko mushtarka kirdar ada karna hoga. Har bachche ko tahaffuz, taleem, izzat o ehtiram aur salahiyatein nikharne ke musawi mawaqe faraham karna zaroori hai.

Unhon ne kaha ke tashaddud ki rok tham ke liye mawassir qanoon sazi, mojooda qawaneen par amalDaramad, awami agahi aur mutasira bachon ko barwaqt moaawanat nagzeer hai, aur aisa nizam tashkeel diya jaye jahan bache bila khauf shikayat kar saken aur unhein fori insaf aur tahaffuz mile.

Chairperson BCSW ne kaha ke bachiyon ko bil-khusoos tashaddud, istehsal, kam umri ki shadi aur deegar imtiazi rawaiyon se mehfooz rakhna waqt ki aham zarurat hai. Unhon ne umeed zahir ki ke qaumi hikmat-e-amli par mawassir amalDaramad se bachon ke huqooq ke tahaffuz, sinfi musawat ke farogh aur mehfooz o munsifana muashre ke qiyam mein madad milegi.

Tasveer: bashukriya DGPR Balochistan