Judges ko dabao se azad karne ke liye code of conduct mein tabdeeli kar di: Chief Justice

Chief Justice Pakistan Yahya Afridi ne ek taqreeb se khitab karte hue kaha ke naujawan judges behtareen andaz mein insaf ki faraahmi yaqeeni banayein, zila adalatein nizam-e-insaf mein reerh ki haddi ki haisiyat rakhti hain.

Unhon ne kaha ke zila adalaton aur High Court ke darmiyan rabita kari mazeed mazboot karna hogi, zila adalatein insaf ki faraahmi ke liye darkar fehrist humein bhijwayein.

Unhon ne yeh bhi kaha ke mulk bhar mein jame nizam-e-insaf ke liye adliya ki zaroriyat poori ki jayengi, hum ne adalati zabta akhlaq mein islahat mutaarif karayi hain, imandari se faraiz anjaam dein.

Chief Justice Yahya Afridi ne kaha ke adalaton ko solar nizam par muntaqil kiya ja raha hai, adliya ko internet ki behtareen sahulat faraham ki jayegi, adalaton ko e-libraries ki sahulat faraham ki jayegi.

Unhon ne kaha ke Balochistan ki tamam tehsilon aur Azla mein bunyadi zaroriyat par kaam jari hai, khawateen aur bachon ke liye sahulat markaz ki faraahmi par kaam jari hai, Tharparkar ki tehsil Nagarparkar mein solar samet tamam sahulatein maujood hain.

Chief Justice ne kaha ke mujhe matehat adliya par fakhr hai, mulk bhar ke judicial officers ko health insurance ki sahulat ka faisla kiya gaya hai, judges ko bairooni dabao se azad karne ke liye code of conduct mein tabdeeli ki gayi, judge ko bairooni dabao se azad karne ke liye poori adliya sath hai.

Unhon ne kaha ke awam ke aitemad ke liye matehat adliya ke judges ko ba-ikhtiyar banana adliya ka maqsad hai, matehat adliya ke judges mushkilat ke bawajood apni zimmedariyan sar anjaam de rahe hain, matehat adliya mein solar, internet, saaf pani ki sahulatein faraahmi mein soobai hukumat ke taawun par mashkoor hain.

Chief Justice ne kaha ke adliya mein behtari ke liye Access to Justice ke tahat rawan saal 3 arab se zaid ke funds jari kiye gaye, maazi mein Access to Justice programme ke tahat 20 saalon mein sirf 900 million jari hue the.

Unhon ne mazeed bataya ke Balochistan ke 18 Azla mein bhi solar pani internet ki sahulat faraham ki ja chuki hai, Balochistan ke jo Azla reh gaye hain wahan ek mah mein sahulatein faraham kar di jayengi.