Jafarabad: Pre-monsoon barishon se nimatne ke liye zilai intezamiya ki farzi hifazati mashq

Jafarabad: Deputy Commissioner Jafarabad Khalid Khan ki khusoosi hidayat par zilai intezamiya ne mumkina pre-monsoon barishon aur kisi bhi hangami soorat-e-haal se moassir andaz mein nimatne ke liye farzi hifazati mashq (mock exercise) mun’aqid ki.

Mashq mein Municipal Corporation, mehkama irrigation, mehkama zaraat, Public Health Engineering aur mehkama Sehat samet tamam mutaliqa line departments ne apni machinery, aalaat aur afradi quwat ke sath bharpoor hissa liya.

Is mauqe par Assistant Commissioner Dhiraj Kalra, Additional Deputy Commissioner Jafarabad Huzoor Bakhsh Bugti, Chief Officer Municipal Corporation Dera Allahyar Ahmed Nawaz Jatak aur Sub Divisional Officer Irrigation Syed Amjad Shah samet deegar afsaran aur ahalkar mojood the.

Deputy Commissioner Khalid Khan ne apne paigham mein kaha ke zilai intezamiya mumkina barishon aur qudrati afaat se nimatne ke liye har waqt mukammal taur par tayyar hai. Tamam mutaliqa mehkame bahami rabte aur marboot hikmat-e-amli ke tehat awam ke jaan o maal ka tahaffuz yaqeeni banayen, aur kisi bhi hangami soorat-e-haal mein fori response, barwaqt imdadi karwaiyan aur nikasi-e-aab ke moassir intezamat awwaleen tarjeeh honge. Unhon ne hidayat ki ke tamam mehkame apni machinery, wasail aur amle ko hama waqt faal rakhen taake kisi bhi nakhushgawar soorat-e-haal se moassir andaz mein nimta ja sake.

Tasveer: bashukriya DGPR Balochistan