Islamabad ke tamam haftawar bazaar fire safety clearance tak band, tajiron ka shadeed ehtijaj

Islamabad: Fire safety intezamat mukammal na hone par CDA ne H-9 aur G-6 samet tamam haftawar bazaar band kar diye.

CDA ki jaanib se jaari notification ke mutabiq mutaliqa hifazati zabton par amal dar amad aur fire safety clearance hasil hone tak bazaar band rahenge.

Tajiron ka mauqaf

Bazaaron ki achanak bandish par tajiron ne shadeed tahaffuzat ka izhar kiya hai. Tajir rahnumaon ka kehna hai ke unhon ne apni jeb se croron rupay kharch kar ke hifazati intezamat mukammal kiye, lekin us ke bawajood bazaar band kar diye gaye.

Tajir rahnuma Asif Malik ke mutabiq dukandaron ne apni madad aap ke tahat hifazati intezamat kiye, guards rakhe aur deegar zaroori iqdamat bhi mukammal kiye. Unhon ne kaha ke woh raat ko bazaar pahunche to bandish ka notice laga hua tha, jabke CDA ne hifazati intezamat par koi raqam kharch nahin ki.

Tajiron ne kaha ke achanak bazaar band karne ka faisla un ke liye shadeed maashi mushkilat ka baais banega. Un ke mutabiq woh ek din bhi Karobar band rakhne ke mutahammil nahin ho sakte, kyunke dukanon ki aamdan se hi un ke gharon ke akhrajat poore hote hain. Bazaar band rehne se un ke gharon ke choolhe thande parne ka khadsha hai.

Shehri bhi pareshan

Doosri jaanib Mehngai ke daur mein sasti ashiya ki kharidari ke liye haftawar bazaaron ka rukh karne wale shehri bhi pareshan hain. In bazaaron mein kam qeemat par ashya-e-zaruriya aur rozmarra istemal ki cheezein kharidne wale shehriyon ko ab mutabadil maqamat par mehnge daamon kharidari karna par sakti hai.

Tajir rahnumaon ne mutalba kiya hai ke bazaar fori taur par khole jayen. Un ka kehna hai ke jab unhon ne hifazati iqdamat mukammal kar liye hain to kisi qism ki inspection ke baghair bazaaron ki bandish ka achanak faisla un ki samajh se bala tar hai.