Islamabad High Court: Jadeed Technology se adalati nizam mein numayan tabdiliyan mutaarif

Chief Justice Sarfraz Dogar ki adalat mein adalati umoor ko mukammal taur par digitalise kar diya gaya, jabke kamra-e-adalat mein screens nasb karke digital sunwaiyon ka aaghaz bhi kar diya gaya hai.

E-court mein case management, online sunwai aur digital record ka istemal kiya jaye ga, jadeed nizam ke tahat adalati karrwai ko zyada munazzam aur kaghazi record par inhisar kam karne ki koshish ki gayi hai.

Digital aur e-court sunwaiyon ke douran Additional Attorney General, Deputy Attorney General aur Prosecutor General Islamabad Manzoor Jajja bhi kamra-e-adalat mein maujood the.

Prosecutor General Islamabad Manzoor Jajja ne kaha ke jadeed Technology ke istemal se muqadmat ki karrwai ko mazeed shaffaf aur tez banane mein madad mile gi.

Unhon ne kaha ke wukala aur sailin ko adalati maloomat tak online rasai ki sahoolat bhi faraham ki ja rahi hai.

Wukala ka kehna hai ke adalati nizam mein Technology ka farogh insaf ki faraahmi ko jadeed taqazon se hum ahang karne ki janib aham qadam hai.