Hukumat aur PTI mein muzakrat ka doosra daur kuch der mein shuru, aham faislay mutawaqqe

Hukumat aur Tehreek-e-Insaf ke darmiyan muzakrat speaker National Assembly Sardar Ayaz Sadiq ki mezbani mein ho rahe hain.

Salman Akram Raja

Muzakrat se qabl Salman Akram Raja ne kaha ke aaj ka din Pakistani qaum ke liye aham hai, hum aql ki baat karne aaye hain, hum Pakistani qaum ka aitemad le kar aaye hain, awam bani PTI ki rihai dekhna chahti hai, hum asiran ki rihai ka mutalba kar rahe hain.

Unhon ne kaha ke mulk mein aaeen o insaf ko bahal karna hai, agar yeh nahin mante to phir hum Pakistani qaum ke saath kharay honge, hum bunyadi mutalbat un ke samne kal bhi rakh chuke hain aaj bhi rakhein ge, hamara bunyadi mutalba bani PTI tak rasai hai.

Unhon ne yeh bhi kaha ke muzakrati committee mein kuch members ne ghair zimmedari ka suboot diya hai, apna yaktarfa bayania media ke samne rakha gaya.

Zaraye ke mutabiq hukumat ne wazeh kar diya ke ehtijaj aur intishar se riayatein nahin milein gi, agar koi riayat chahiye to sanjeedgi ka muzahira karna hoga.

Zaraye ka kehna hai ke agar opposition ki hut dharmi jari rahi to article 232 aur 234 burue kar laye jayenge.

Tariq Fazal Chaudhry

Tariq Fazal Chaudhry ne X par likha ke hukumat opposition ke saath muzakrat ko bamaqsad aur nateeja khez banana chahti hai lekin muzakrat ke dauran wazir-e-aala KP Sohail Afridi ke bayanat is amal ko mutasir kar sakte hain.

Unhon ne kaha ke Tehreek-e-Insaf ki qiyadat ko chahiye ke muzakrat ke hatmi marhale tak is qism ki guftagu se ijtinab karein jis se is amal ko nuqsan ho, Sohail Afridi jo apne mukhalifin aur hamari qiyadat ke khilaf istemal kar rahe hain woh aik wazir-e-aala ki nahin lagti, un ki guftagu intehai ghair shaista aur qabil-e-mazammat hai.

Sohail Afridi ka march ke aghaz ka elan

Idhar wazir-e-aala Khyber Pakhtunkhwa Sohail Afridi ne elan kiya hai ke PTI ka long march 4 October ko Lakki Marwat ke Gandi Chowk se Islamabad ke liye rawana hoga aur woh khud qafile ki qiyadat karein ge.

Guzishta roz Peshawar mein PTI secretariat mein fund raising taqreeb se khitab karte hue unhon ne karkunon se ehtijaj mein bharpoor tayyari ke saath shirkat ki appeal ki.

Wazir-e-aala ki janib se elan kardah schedule ke mutabiq march ka pehla padao Karak hoga, jis ke baad 5 October ko qafila Kohat pahunchay ga.