Gwadar: DEO (Khawateen) ka Klanch aur Sarbandan ke girls schoolon ka daura, furniture aur chardiwari ke masail ka jaiza

Gwadar: Chief Minister Balochistan Mir Sarfraz Bugti ke vision aur soobai hukumat ki taleemi policy ke tahat zila Gwadar mein taleemi idaron ki behtari, talaba o talibat ko bunyadi sahuliyat ki faraahmi aur miyari taleem ke farogh ke liye schoolon ki baqaida monitoring ka silsila jari hai.

Isi silsile mein District Education Officer (Khawateen) Gwadar Zaraton Baloch ne mukhtalif taleemi idaron ka daura kiya aur taleemi o intizami umoor, tadrisi sargarmiyon aur dastiyab bunyadi sahuliyat ka jaiza liya.

Government Girls Middle School Chibwari, Klanch mein talibat aur tadrisi amle se mulaqat ki gayi, jahan talibat ne furniture ki zaroorat se agah kiya, jabke school ki chardiwari na hone samet deegar bunyadi masail ka bhi jaiza liya gaya. Baad azan Government Girls Primary School Ahmed Bazar, Klanch mein talaba ki taleemi sargarmiyon aur tadrisi mahaul ka mushahida kiya gaya, jahan talaba ne taleem mein bharpoor dilchaspi zahir ki aur furniture, uniform aur deegar sahuliyat ki zarooriyat ka jaiza liya gaya.

Government Girls Higher Secondary School Sarbandan mein faculty arkan se mulaqat mein school ke masail, taleemi umoor, talaba ki registration aur tadrisi sargarmiyon par tabadla-e-khayal kiya gaya, aur asatiza ne taleemi miyar mein behtari aur sazgar mahaul ke liye tajaveez pesh keen.

Is moqe par kaha gaya ke Chief Minister ke vision ke mutabiq soobe mein taleem ko khusoosi tarjeeh hasil hai, bil-khusoos door daraz ilaqon ke taleemi idaron mein bunyadi sahuliyat, taleemi miyar mein behtari aur sazgar mahaul ki faraahmi ke liye moassir iqdamat kiye ja rahe hain.

Tasveer: Bashukriya DGPR Balochistan