Gas shobe ki islahat marhala war aur mushawarat se hongi: Wazir-e-Khazana Muhammad Aurangzeb

Islamabad: Wafaqi wazir-e-khazana o mahsulat Senator Muhammad Aurangzeb ne gas ke shobe mein islahat par marhala war aur mushawarat ke zariye amalderamad karne ke hukumati azm ka aada kiya hai.

Unhon ne kaha ke maali paidari ko mazboot banane, operational karkardagi mein behtari, sarmaya kari ke farogh aur sarifeen ke mufadat ka tahaffuz yaqeeni banate hue gas ki zyada musabiqati mandi tashkeel dene ke liye tamam koshishen yaqeeni banai ja rahi hain.

Woh peer ko Pakistan ke gas ke shobe mein tanzeem-e-nau aur deregulation ke mujawwaza laiha-e-amal ka jaiza lene ke liye munaqida aala satah ke ijlas se khitab kar rahe the. Ijlas mein maali istehkam, operational karkardagi, sarifeen ke mufadat ke tahaffuz aur nijji shobe ki zyada se zyada shamooliyat par tawajjuh markooz ki gayi.

Ijlas mein zer-e-ghaur masail

Ijlas ko bataya gaya ke mujawwaza islahat ka maqsad gas ki aik aisi maali tor par paidar, moassir aur musabiqati mandi qaim karna hai jis se karobari sargarmiyon ko sahara mile, nijji sarmaya kari ki hosla afzai ho aur sarifeen ke mufadat ka tahaffuz yaqeeni banaya ja sake.

Ijlas mein moassir zabita kari, operational karkardagi mein behtari aur gas ki qeematon ke taayyun aur faraahmi ke liye zyada paidar tariq-e-kar ke tehat marhala war musabiqati nizam ki janib pesh rafat par ghaur kiya gaya.

Gas ke shobe ko darpesh aham masail ka jaiza liya gaya jin mein gardishi qarza, mukhtalif sarifeen ke liye qeematon mein bahmi aanat (cross subsidy), gas ke ghair hisab shuda nuqsanat (UFG) aur rasad o talab mein adam tawazun shamil hain.

Shurka ne sabiqa maali wajibat ke tasfiye, gas utility companies ki maali haisiyat behtar banane aur is amr ko yaqeeni banane par tabadla-e-khayal kiya ke maazi ke maali masail mujawwaza mandi ke dhanche ko mutasir na karen aur sarifeen par bhi ghair zaroori bojh na pade.

Ijlas mein zor diya gaya ke gardishi qarze ke sabiqa wajibat ka paidar hal aur cross subsidy ke khatme ya is mein islah ke liye wazeh hikmat-e-amli, tanzeem-e-nau ke baad qaim hone wale idaron ki maali paidari aur musabiqati mandi ki janib muntaqili ke liye nihayat aham hai.

Mutawaqqa nataij

Ijlas mein mujawwaza islahati framework ke mutawaqqa nataij par bhi ghaur kiya gaya jin mein tawanai ka tahaffuz aur faraahmi ka istehkam, nijji shobe ki sarmaya kari mein izafa, maaliyati aur hukumati zamanaton se mutaaliq khatrat mein kami, karobari idaron ke darmiyan gas ki barah-e-raast khareed o farokht ko farogh dena, qeematon mein zyada istehkam aur paidari, bar-amad kunindgan ko musabiqati nirkhon par gas ki behtar dastyabi aur karkardagi ke moassir miyaraat aur karkardagi se mashroot maraat ke zariye nizam mein gas ke nuqsanat mein kami shamil hain.

Wafaqi wazir-e-khazana ne zor diya ke tamam mutaaliqa fariqon ko islahat ke aik aise amli aur qabil-e-nafaz nizam par muttafiq kiya jaye jis par moassir andaz mein amalderamad mumkin ho.

Mujawwaza framework ki tayyari mein Turkiye aur Britain samet deegar mamalik mein gas ke shobe ki islahat ke International tajurbat se istifada kiya gaya hai, taham Pakistan ke idarajati dhanche, mandi ke halat aur sarifeen ke mufadat ko bhi madde-nazar rakha gaya hai.

Shurka ne is baat par bhi zor diya ke islahat par marhala war aur munasib tarteeb se amal kiya jaye taake gas ki faraahmi ka tasalsul barqarar rahe, zabita jati nizam ke tehat aane wale sarifeen ke mufadat ka tahaffuz ho aur nijji shobe ki shamooliyat ke liye aik mustahkam aur qabil-e-pesh goi mahol faraham kiya ja sake.

Ijlas ko bataya gaya ke mujawwaza islahati framework wazir-e-azam ke samne pesh kiya jayega, jis ke baad mazeed technical kaam aur mutaaliqa fariqon se mushawarat ke zariye islahat ke tariq-e-kar ko mazeed behtar banaya jayega aur is nizam ki janib munazzam andaz mein muntaqili ko yaqeeni banane mein madad milegi.

Ijlas mein hukumat ke is azm ka aada kiya gaya ke gas ke shobe mein islahat par marhala war aur mushawarat ke zariye amalderamad kiya jayega taake maali paidari ko mazboot banaya ja sake, operational karkardagi behtar ho, sarmaya kari ko farogh mile aur sarifeen ke mufadat ka tahaffuz yaqeeni banate hue gas ki zyada musabiqati mandi tashkeel di ja sake.

Ijlas mein wafaqi wazir-e-petroleum, wazir-e-azam ke mushir bara-e-nijkari, wazir-e-azam ke moawin-e-khusoosi bara-e-tawanai, wizarat-e-petroleum aur wizarat-e-khazana ke senior hukkam, gas utility companies ke numainDon aur aalmi bank ki team ne shirkat ki.