Field Marshal ka daura Iran Trump ya America ke numainde ki haisiyat se nahin tha: Dafter-e-Kharja

Haftawar press briefing ke dauran tarjuman Tahir Andrabi ka kehna tha ke Pakistan samajhta hai ke maujooda ilaqai challenges ka paedar hal baat cheet aur safarkari ke zariye hi mumkin hai aur is maqsad ke liye Pakistan apni koshishein jari rakhega.

Tarjuman Tahir Hussain Andrabi ne kaha ke Pakistan ki safarti koshishon ke silsile mein Field Marshal Asim Munir ne 24 August ko Iran ka daura kiya, jis mein irani qiyadat se kashidagi ke khatme ke hawale se tafseeli guftagu hui.

Unhon ne wazeh kiya ke Field Marshal ka daura Iran Trump ya America ke numainde ki haisiyat se nahin tha, Field Marshal ka daura Iran Pakistan ki jari safarti koshishon ke tanazur mein tha, Pakistan khitte mein kashidagi ke khatme aur Middle East bohran ke hal ke liye biradar mumalik ke sath rabton mein hai.

Unhon ne mazeed kaha ke is se qabl wazir-e-kharja ne 14 August ko Tehran ka daura kiya, jahan hone wali baat cheet mein khitte mein kashidagi mein kami, fauji ta’attul khatam karne aur muzakirat ke zariye tanaze ka hal talash karne par tawajjoh markooz ki gayi.

Tahir Hussain Andrabi ne kaha ke Pakistan Afghanistan ke sath riyasti satah par baat cheet ke liye tayyar hai, taham is ke liye afghan aburi hukumat ko thos suboot faraham karna honge ke woh dehshatgardi ke khilaf muassir karwaiyan kar rahi hai.

Bharti Chief of Defence Staff ki janib se Kirana Hills par hamle se mutaliq bayan par rad-e-amal dete hue Tahir Andrabi ne kaha ke Pakistan ke strategic asase mukammal taur par mehfooz hain aur Pakistan apne strategic asson ke tahaffuz aur salamti ke mamle par kisi qism ka samjhauta nahin karega.

Tarjuman Dafter-e-Kharja ne bharti hukkam ke bayanat ko mustarad karte hue kaha ke Bollywood style bayanat ki koi ahmiyat nahin, unhon ne sawal uthaya ke 16 se 18 mahine baad is tarah ke bayanat dene ki kya wajah hai?

Tahir Andrabi ne bataya ke Pakistan ne SCO mein aik saal ke liye chairmanship sambhali hai, Pakistan 2027 mein SCO ki mezbani karega, wazir-e-azam Bishkek mein SCO conference mein shareek hue.

Unhon ne kaha ke wazir-e-azam SCO conference ke moqe par do tarfa mulaqatein karenge, wazir-e-azam Shehbaz Sharif ki Kyrgyzstan ki qiyadat se bhi mulaqatein hongi.

Unhon ne wazeh kiya ke Iran ke sath tijarat International tijarat qawaneen ke tabe hai, Pak-Iran tijarat jari hai aur Pakistan ise farogh dene ka khwahan hai.

Unhon ne mazeed kaha ke Pakistan Iran ke khilaf yak tarfa pabandiyon par amal ka paband nahin, Iran ke khilaf Aqwam-e-Muttahida ki pabandiyan aid hon to mamla dusra hoga, Pakistan ne hamesha Aqwam-e-Muttahida ke daire se bahar pabandiyon jaise yak tarfa iqdamat ki hamesha muzammat ki hai