Deputy Commissioner Ziarat ki zer-e-sadarat District Health Committee ka ijlas, tamam bunyadi marakiz-e-sehat faal rakhne ki hidayat

Ziarat: Deputy Commissioner Ziarat Abdul Quddus Achakzai ki zer-e-sadarat District Health Committee ka aham ijlas munaqid hua, jis mein zila mein sehat-e-aama ki surat-e-haal, bunyadi marakiz-e-sehat (BHU) ki faaliyat, tibbi sahuliyat ki farahmi aur mahkama sehat se mutaalliq mukhtalif umoor ka tafseeli jaiza liya gaya.

Ijlas mein District Health Officer Dr Muhammad Rafiq Mastoi, District Accounts Officer Abdul Ghani Kakar, Deputy DHO Dr Muqeet Khan Kakar, District Support Manager PPHI Mumtaz Rind, MS DHQ hospital Shamsullah, MS THQ Sanjawi Dr Noor ul Baqi, Farmanullah aur deegar afsaran ne shirkat ki.

Ijlas ke dauran bunyadi marakiz-e-sehat ki faaliyat, tibbi amle ki hazri, doctors aur paramedical staff ki dastiyabi, mareezon ko sahuliyat ki farahmi, adviyat ki dastiyabi o taqseem aur sehat marakiz ke intizami umoor ka jaiza liya gaya.

Deputy Commissioner ne hidayat ki ke tamam bunyadi marakiz-e-sehat ko faal rakha jaye aur awam ko barwaqt o miyari tibbi sahuliyat ki farahmi yaqeeni banai jaye. Unhon ne doctors, paramedics aur deegar amle ki hazri, adviyat ki dastiyabi aur munasib taqseem ke sath sehat marakiz mein safai suthrai aur deegar intizamat behtar banane par zor diya.

Ijlas mein sehat marakiz ki muassir nigrani, amle ki hazri aur adviyat ki farahmi se mutaalliq aham faislay kiye gaye aur afsaran ko in par barwaqt amldaramad yaqeeni banane ki hidayat jari ki gayin.

Tasveer: Bashukriya DGPR Balochistan