Defence Forces Act 2026, National Command Authority Act 2010 mein tarmeem manzoor

Wazir-e-azam Shehbaz Sharif ki zer-e-sadarat ijlas mein wafaqi cabinet ne Defence Forces Act 2026 ke masawwade aur National Command Authority Act 2010 mein tarmeem ki manzoori de di.

Wafaqi cabinet ne Defence Forces Act 2026 ke masawwade ki manzoori di. Hukumat ke mutabiq yeh masawwada 27wein aini tarmeem ke tahat ki jane wali tabdiliyon ke tasalsul mein tayyar kiya gaya hai.

Cabinet ki manzoori ke baad Defence Forces Act 2026 ka masawwada parliament ke jari ijlas mein manzoori ke liye pesh kiya jayega.

Ijlas mein National Command Authority Act 2010 mein tarmeem ki bhi manzoori di gayi. Hukumat ke mutabiq 27wein aini tarmeem ke baad National Command Authority Act mein tarameem zaroori ho gayi thin, jis ke tahat mutaliqa qanooni aur intizami umoor ko naye aini dhanche se hum aahang kiya jayega.

Wafaqi cabinet se manzoor shuda National Command Authority Act 2010 mein tarmeem ka masawwada bhi parliament mein manzoori ke liye pesh kiya jayega. Act ka maqsad Chief of Defence Forces ke ohde aur headquarters ke intizami umoor ka taayyun karna hai.

Ijlas mein donon qanooni masawwadon ki manzoori ke baad ab unhein parliamentary amal se guzara jayega, jahan arkan-e-parliament un par ghaur aur manzoori dein ge.

Ijlas mein mulki siyasi aur maashi surat-e-haal ka bhi jaiza liya gaya, cabinet ijlas mein mulk ki mujmui Aman o Aman ki surat-e-haal par tafseeli ghaur kiya gaya, ijlas mein Aman o Aman ki surat-e-haal behtar banane ke liye iqdamat ka bhi jaiza liya gaya jabke bani PTI Imran Khan ki Sehat se mutaliq adalati faisle par bhi arkan ko aitemad mein liya gaya