Chief Secretary ko chaar mahkamon ki do salah karkardagi reports pesh, QDA ko urban forest mansooba shuru karne ki hidayat

Quetta: Chief Secretary Balochistan Shakeel Qadir Khan ki zair-e-sadarat ijlas mein mahkama itlaat, Quetta Development Authority, Gwadar Development Authority aur mahkama mahaulyat ke secretaries ne apne mahkamon ki do salah karkardagi reports aur mustaqbil ka laiha-e-amal pesh kiya. Ijlas mein guzishta do saal ki karkardagi, maliyati muamalat, awami khidmat aur aainda mansooba bandi ka jaiza liya gaya.

Mahkama itlaat ne awami agahi aur media rawabit se mutaliq iqdamat ki tafseel pesh ki, jis par Chief Secretary ne itminan ka izhar karte hue awami mufad ke mansoobon ki barwaqt tashheer aur shaffafiyat yaqeeni banane ki hidayat ki.

Quetta aur Gwadar Development Authorities ne amdani mein izafe, mahsulat aur infrastructure mansoobon par briefing di. Chief Secretary ne amdani barhane ke iqdamat ki hausla afzai ki, mazeed shaffaf aur mustaqil zaraye amdan farogh dene par zor diya aur Quetta Development Authority ko shehar mein “urban forest” project aur business center mansooba par barwaqt kaam shuru karne ki khusoosi hidayat ki.

Mahkama mahaulyat ne guzishta do saal mein mahaulyati monitoring, aloodgi control aur tahaffuz ke iqdamat se agah kiya. Ijlas mein mahaulyati tahaffuz ko soobai taraqqiyati agenda ka lazmi juz qarar dete hue sanati o shehri mansoobon mein mahaulyati asraat ke andaze (EIA) par sakhti se amal-daramad ki hidayat ki gayi. Chief Secretary ne kaha ke hukumat Balochistan ki awwalin tarjeeh awami mufad, shaffafiyat aur khidmat ki barwaqt faraahmi hai.

Tasveer: bashukriya DG PR Balochistan