Chief Secretary Balochistan Shakeel Qadir Khan ki zair-e-sadarat RISE program ka ijlas, chhe Azla mein naujawanon ke rozgar ka mansooba

Quetta: Chief Secretary Balochistan Shakeel Qadir Khan ki zair-e-sadarat “RISE” (RISE) program se mutaliq aik aham ijlas munaqid hua, jis mein program ke mukhtalif mansoobon, ab tak ki pesh raft aur naujawanon ke liye rozgar ke naye mawaqe paida karne ke hawale se tafseeli briefing di gayi.

Chief Secretary ne kaha ke soobai hukumat awam ko ba-izzat rozgar ke mawaqe dene, naujawanon ki salahiyatein ujagar karne aur unhein jadeed fanni o pesha warana tarbiyat se aarasta karne ke liye jame iqdamat kar rahi hai. Un ka kehna tha ke hukumat ki awleen tarjeeh awam ki falah o behbood, maashi khudmukhtari aur miyar-e-zindagi mein behtari hai, isi maqsad ke tahat aise mansooba shuru kiye ja rahe hain jo naujawanon ko rozgar, hunar aur karobar ke mawaqe faraham kar sakein.

Unhon ne azm zahir kiya ke hukumat Balochistan ke awam ko taraqqi ke samraat un ki dahleez tak pahunchane aur soobe ke naujawanon ko roshan o mehfooz mustaqbil dene ke liye tamam dastiyab wasail buroe kaar laegi.

Ijlas ko bataya gaya ke RISE program ke tahat naujawanon ko jadeed aur market based hunar sikhane par khusoosi tawajjo di ja rahi hai taake woh ba-izzat rozgar ke qabil ban sakein. Program ke tahat fanni o pesha warana tarbiyat, karobari mawaqe, maali moawanat aur rozgar ke mukhtalif shobon se naujawanon ko munsalik karne ke iqdamat jari hain.

Chhe Azla, 16,500 gharane

Briefing mein bataya gaya ke program mein chhe Azla Panjgur, Kharan, Washuk, Gwadar, Awaran aur Kech shamil hain. Mansoobe ke tahat 57,464 micro enterprises qayam kiye jayenge, 4,320 naujawanon ko fanni o pesha warana tarbiyat de kar rozgar se munsalik kiya jayega, 1,620 mausamiyati tabdeeli se mehfooz infrastructure tameer honge aur 180 maqami tanzeemon ko mazboot banaya jayega.

Is ke alawa 900 naujawanon ko social change agents ke taur par tarbiyat di jayegi, 12,000 naujawanon aur karobari afraad ko maali khidmaat aur aasan qarzon tak rasai milegi, jabke mazboot banaye jane wale 180 chhote o darmiyane karobari idaron ke zariye mazeed 1,800 gharanon ke liye rozgar ke mawaqe paida honge. In iqdamat se taqriban 16,500 gharanon ke rozgar aur maashi sargarmiyon ko mausamiyati khatrat se mehfooz banane mein madad milegi.

Program ke tahat Kharan, Panjgur aur Washuk ke Azla mein khajoor, cotton, gandum, zeera, livestock, hand made Balochi embroidery aur food processing samet kayi aham sectors aur trades shamil kiye gaye hain.

South Air ke taawun se flight crew ki tarbiyat

South Air ke taawun se Balochistan ke naujawanon ko flight crew ki tarbiyat di jayegi, jis ke zariye unhein aviation ke shobe mein career banane, airlines mein mulazimat ke mawaqe hasil karne aur jadeed fazai safari nizam se mutaliq pesha warana maharatein seekhne ka mauqa milega. Is ke alawa Tech Valley ke sath bhi jald kaam ka aaghaz kiya jayega.

Ijlas mein Secretary Industries Khalid Sarparah, CEO Balochistan Rural Support Program Dr Tahir Rasheed aur deegar ne shirkat ki.

Tasveer: bashukriya DG PR Balochistan