Bijli ki zaruriyat poori karne ke liye 47 arab dollar ke tausee mansube ki manzoori

NEPRA ne Independent System and Market Operator (ISMO) ki janib se pesh kiye gaye Integrated System Plan 35-2025 ki manzoori di, taham 90 crore dollar ki Battery Energy Storage System (BESS) sarmaya kari ko ghair zaroori qarar dete hue mustarad kar diya.

NEPRA ne yeh bhi inkishaf kiya ke Pakistan mein ab tak ki sab se sasti qabil-e-tajdeed bijli ko aik saal se zaid arse tak qaumi mansoobabandi mein shamil hi nahin kiya gaya, halanke regulator ki janib se mutaddid baar intibah kiya gaya tha.

Is mansube ke mutabiq mulk mein bijli ki zyada se zyada talab 2025 mein 26 hazar 950 megawatt se barh kar 2035 mein 35 hazar 521 megawatt tak pahunchne ka imkan hai, is talab ko poora karne ke liye mujmui tor par 26 hazar 45 megawatt nayi bijli paida karne ki salahiyat darkar hogi, jis mein 17 hazar 485 megawatt pehle se mukhtas mansube aur 8 hazar 560 megawatt nayi behtar andaz mein tajweez kardah salahiyat shamil hai.

Is dauran 2 hazar 577 megawatt bijli paida karne ki salahiyat retire hone ka takhmina lagaya gaya hai, bijli paidawar ke in mansoobon par mutawaqqa lagat 47.13 arab dollar jabke tarseeli nizam mein upgradation ke liye mazeed 10.65 arab dollar darkar honge.

NEPRA ne mojooza battery energy storage system ko manzoori dene se inkar karte hue qarar diya ke is ki lagat ko ISMO ke optimization model mein haqeeqatan shamil karke jancha hi nahin gaya, NEPRA ne hidayat ki ke is mansube par mukammal takneeki mutalia karaya jaye, jis ke baad is par dobara ghaur kiya ja sakta hai.

NEPRA ne K-Electric ke liye NGC-KEL interconnection transmission line ko bhi 2028 mein mukammal karne ki tajweez ki tauseeq nahin ki, regulator ke mutabiq yeh muddat haqeeqat pasandana nahin kyunke is line ki tameer mein taqriban paanch saal darkar hote hain.

Yeh mansooba ISMO ne tayyar kiya hai, jo Pakistan ke bijli ke nizam ko chalane aur munazzam karne wala idara hai, Integrated System Plan mein buniyadi tor par do hisse shamil hain, aik mulk mein naye bijli gharon ki tameer se mutaliq aur doosra bijli ki tarseel ke liye nayi transmission lainon ki tameer se mutaliq hai.

NEPRA ne ISMO ko hidayat ki ke aaindah mansooba tayyar karne se qabl kai khamiyon ko door kiya jaye, jin mein aadad o shumar ki zyada wazeh wazahat aur bijli ke tariff se mutaliq paish goiyon mein maujood farq ko door karna bhi shamil hai.

Is faisle ki aik aham baat yeh hai ke NEPRA ke arkan bhi mukammal tor par aik raye par muttafiq nahin the aur har rukn ne apne tahaffuzat par mushtamil alag note tehreer kiya.

NEPRA ke rukn Maqsood Anwar Khan ne baaz pan bijli mansoobon ko mansube se nikale jane par aitraz kiya, jin mein Gabral Kalam, Madyan, Kalam Asrit aur Asrit Kedam ke mansoobe shamil hain, in mansoobon ko is se qabl manzoor shuda aur mehfooz qarar diya gaya tha.

Maqsood Anwar Khan ne moaqqif ikhtiyar kiya ke in mansoobon ko wazeh ya qanooni jawaz ke baghair khamoshi se mansube se kharij kiya gaya, jis se un sarmaya karon ki hausla shikni ho sakti hai jinhon ne pehle di gayi yaqeen dehaniyon ki bunyad par sarmaya kari ki thi.

Mansooba sazon, karobari tanzeemon aur soobai hukumaton samet mukhtalif stakeholders ne bhi tahaffuzat ka izhar karte hue kaha ke Pakistan pehle hi 15 se 20 gigawatt izafi bijli paida karne ki salahiyat rakhta hai, jabke maujooda bijli ghar sirf taqriban 45 fisad salahiyat par chal rahe hain.

Stakeholders ne khabardar kiya ke mazeed sarmaya kari se gardishi qarzay aur capacity payments mein izafa ho sakta hai, jis ka bil akhir bojh bijli sarifeen ko apne bilon ki soorat mein bardasht karna parega.

NEPRA ke andar se sab se sakht tanqeed rukn Amina Ahmed ki janib se samne aayi, apne ikhtilafi note mein unhon ne kaha ke K-Electric ne 2024 ke awakhir mein qabil-e-tajdeed tawanai ki neelami ke dauran 3.09 Amreeki cent fi kilowatt ghanta tak ke tariff hasil kiye the, jo Pakistan mein ab tak ka kam tareen tariff hai.

Un ke mutabiq ISMO ne taqriban 640 megawatt ke in mansoobon ko aik saal se zaid arse tak apne mansoobon mein shamil nahin kiya, halanke NEPRA ki janib se mutaddid martaba is muamle par sawal uthaye gaye, jin mein March 2026 ki aik darkhwast bhi shamil thi.

Amina Ahmed ne inkishaf kiya ke ISMO ne apne model mein ghalat aadad o shumar istemal kiye the, July 2026 mein aadad o shumar durust kiye jane ke baad maloom hua ke sasti bijli ko shamil karne se nizam ki lagat mein izafa nahin balke kami hui.

Un ke mutabiq yeh surat-e-haal ISMO ki optimization ke amal par NEPRA ke aitmad ko namayan tor par mutasir karti hai.

NEPRA ke chairman Waseem Mukhtar ne hatmi faisle ki himayat ki, taham unhon ne aik bare masle ki nishandehi karte hue kaha ke Pakistan zaroorat se zyada bijli paida karne ki salahiyat ki adaigi kar raha hai, jis ke baais bijli ke bil musalsal mehenge ho rahe hain.

Unhon ne bataya ke qaumi grid se din ke auqat mein bijli ki talab pehle hi kam ho kar taqriban 12 hazar megawatt reh gayi hai, kyunke zyada se zyada log bijli ke qaumi grid par inhisar karne ke bajaye solar panels aur deegar mutabadil zaraye istemal kar rahe hain.