Balochistan ke masail dialogue se hal hone chahiyen, wasail par pehla haq awam ka hai: Wazir-e-azam

Balochistan National Workshop se khitab karte hue Shehbaz Sharif ne shurka ko hukumat ki janib se khush amdeed kaha aur kaha ke woh unhein dil ki gehraiyon se khush amdeed kehte hain.

Unhon ne kaha ke Balochistan Pakistan ka woh ilaqa hai jo Baloch aur Pashtun aqwam par mushtamil hai, jabke Balochon ki tareekh daleri, mehman nawazi, rawadari aur azeem rawayat se muzayyan hai, dialogue ka maqsad shurka aur Baloch awam ki baat sunna hai.

Wazir-e-azam ka kehna tha ke Pakistan ke maraz-e-wujood mein aate hi Balochistan ke mukhtalif hisson ne Pakistan ke sath ilhaq kiya, Baloch umaideen aur awam ne dil ki awaz par Pakistan ke sath ilhaq kiya, Balochistan ko darpesh masail dialogue ke zariye hal hone chahiyen.

Shehbaz Sharif ne kaha ke masail ki aad mein koi muhib-e-watan bandooq nahin utha sakta, hamein khooni sarak ko aman ki sarak banana hai, ghus baithiye dushman mumalik se wasail hasil kar rahe hain jab ke hamare shuhada apni janein qurban karke doosron ki zindagiyan bacha rahe hain.

Un ka kehna tha ke jo kuch ho gaya, ho gaya, ab grand dialogue karna hoga, agar Balochistan ke bete aur betiyan apna rasta durust karne ke liye tayyar hain to unhein khush amdeed kehna chahiye.

Wazir-e-azam ne kaha ke sakht se sakht masle ko bhi dialogue ke zariye hal kiya ja sakta hai, Balochistan ke wasail par pehla haq sooba ke awam ka hai, Balochistan ko darpesh masail ka hal baat cheet aur mukalme ke zariye nikala jana chahiye.

Shehbaz Sharif ka kehna tha ke sakht se sakht masle ko bhi baat cheet aur mukalme ke zariye hal kiya ja sakta hai, hukumat Balochistan ke jaiz shikwon ko ek martaba nahin balke hazar martaba sunne ke liye tayyar hai, Balochistan mein mazdoori karne wale afrad ko shanakht ki bunyad par qatl karna kisi surat jaiz nahin.

Unhon ne kaha ke wasail ki munsifana taqseem hi masail ke hal ka muassir tareeqa hai, jab tak Balochistan taraqqi ki daud mein shamil nahin hoga, Pakistan taraqqi nahin kar sakta, isi tarah jab tak mulk ke charon soobe taraqqi ki daud mein shamil nahin honge, Pakistan aage nahin barh sakta.

Wazir-e-azam ne kaha ke Balochistan aur Khyber Pakhtunkhwa mein Dehshatgardi ke peechay dushman mumalik ka hath hai, unhon ne kaha ke unhon ne aur Field Marshal ne mil kar khoon ki sarak ko aman ki sarak mein tabdeel karne ka faisla kiya hai.

Shehbaz Sharif ka mazeed kehna tha ke riyasat maan ka darja rakhti hai aur maan kabhi nahin chahti ke us ke bachon ko takleef pohnche, Balochistan ke awam ke jaiz masail aur shikayat ka izala baat cheet, insaf aur wasail ki munsifana taqseem ke zariye kiya ja sakta hai.