Alami shohrat yafta Misri qurra kiram Pakistan pahunch gaye, wafaqi wazir mazhabi umoor ka khair maqdam

Qari Ayub Asif, Qari Taha Nomani, Qari Ibrahim Asif, Qari Maher Al Shanawi aur Qari Ismail Asif Pakistan pahunch gaye hain.

Is moqe par wafaqi wazir mazhabi umoor Sardar Muhammad Yousuf ne kaha ke Pakistani qaum Quran-e-Kareem, qurra aur khuddam-e-Quran se gehri mohabbat aur aqidat rakhti hai, Misri qurra kiram ki Pakistan aamad ahl-e-Pakistan ke liye baais-e-masarrat aur aizaz hai.

Sardar Muhammad Yousuf aur deegar shurka ne Misri qurra kiram se unki dilnasheen awazon mein tilawat-e-Quran-e-Kareem sunne ka sharf hasil kiya.

Wafaqi wazir mazhabi umoor ne kaha ke ahl-e-Pakistan alami shohrat yafta Misri qurra kiram ki rooh parwar tilawat se mustafid honge, unki Pakistan aamad se awam ko Quran-e-Kareem ki khoobsurat tilawat sunne ka moqa milega.

Unhon ne bataya ke Misri qurra kiram 5 September ko baad namaz-e-asr Faisal Mosque Islamabad mein azeem-ush-shan mehfil-e-husn-e-qirat mein shirkat karenge, Faisal Mosque mein mehfil-e-husn-e-qirat aam-matul-naas ke liye munaqid ki jayegi.

Sardar Muhammad Yousuf ne kaha ke yeh ijtima Quran-e-Kareem ke paigham, mohabbat aur Islami akhuwat ke farogh ka zariya banega.