Afghanistan Pakistan ke khilaf Dehshatgardi ka aham markaz ban chuka hai: Washington Post

Washington Post ki khusoosi report mein kaha gaya hai ke Taliban regime ke iqtidar mein aane ke baad Al Qaeda ne Afghanistan mein kam az kam 8 naye tarbiyati markaz qaim kiye, Taliban regime ne Al Qaeda aur deegar dehshat gard groohon ke liye Afghanistan mein ek permissive mahaul paida kar rakha hai.

Report ke mutabiq Al Qaeda ke mehfooz thikane aur tarbiyati camp Afghanistan ke mukhtalif ilaqon mein dobara faal ho rahe hain, Al Qaeda aur deegar dehshat gard tanzeemon ne Afghanistan ke kam az kam 14 sooboon mein qadam jama liye hain.

Washington Post ke mutabiq Afghanistan mein Al Qaeda ab sirf panah gah nahin balke deegar dehshat gard groohon ko tarbiyat aur mushawarat faraham karne ka kirdar ada kar rahi hai, Al Qaeda Afghanistan mein TTP samet deegar groohon ko khufia karrawaiyon aur security ke hawale se tarbiyat de rahi hai.

Bataya gaya hai ke Iqwam-e-Muttahida ke mutabiq Afghanistan mein Al Qaeda ke arkan TTP ke liye khudkush hamla awaron ki tarbiyat bhi kar rahe hain, TTP ke Afghanistan mein taqriban 7 hazar jangju maujood hone ka andaza hai jo Pakistan ke khilaf karrawaiyan kar rahe hain, TTP ne Afghanistan ke kam az kam 4 sooboon mein camp qaim kar rakhe hain, jin mein Al Qaeda aur Taliban ke mulawwis hone ki ittilaat hain.

Washington Post ke mutabiq Afghan sarzameen se TTP ke Pakistani fauji chowkiyon aur deegar ahdaf par saikdon sarhad paar hamlon ka inkishaf hua hai, Taliban regime ke zer-e-asar Afghanistan TTP ke liye mehfooz panah gah aur Pakistan mukhalif Dehshatgardi ka aham markaz ban chuka hai.

Report ke mutabiq Afghanistan mein Al Qaeda ke sath Daesh Khorasan bhi apne network ko wusat de rahi hai, Daesh Khorasan ne taqriban 2 hazar jangju bharti kiye, shumali Afghanistan ko tarbiyat aur karrawaiyon ka markazi markaz banaya, Afghanistan mein Al Qaeda aur Daesh Khorasan samet mukhtalif jihadi tanzeemon ke qadam jamane se khitte ko naya Dehshatgardi ka khatra darpesh hai.

Washington Post ki report mein wazeh kiya gaya ke Taliban regime ke iqtidar mein Afghanistan mein dehshat gard groohon ki sargarmiyon ka dobara munazzam hona aalami tashweesh ka baais ban raha hai, Afghanistan mein Al Qaeda aur Daesh Khorasan maqami aur hamsaya mumalik se naye jangju bharti karne par tawajjoh de rahi hain.

Report ke mutabiq Amriki intelligence salahiyaton mein kami ke baais Afghanistan mein naye dehshat gard tarbiyati markaz ki nigrani mushkil ho gayi, Taliban regime ke daawon ke bar-aks Afghanistan mein Al Qaeda, TTP aur Daesh Khorasan ki maujoodgi Dehshatgardi ke musalsal khatre ki nishandehi karti hai.

Washington Post ke mutabiq Afghanistan mein dehshat gard networks ki dobara munazzam hoti sargarmiyan 9/11 ke baad hasil ki gayi kamyabiyon ke liye naya challenge hain, Washington Post ke mutabiq Afghanistan ek baar phir aisa mahaul faraham kar raha hai jahan Al Qaeda aur deegar dehshat gard groh apni salahiyaten bahal kar sakte hain.