Supreme Court: Imaan Mazari aur Hadi Chattha ki sazayen muattal, zamanat par rihai ka hukum

Justice Naeem Akhtar Afghan ki sarbarahi mein do rukni bench ne aaj Imaan aur Hadi ki darkhwaston par sunwai ki, court ne do lakh rupay ke zamanati muchalke ke iwaz zamanat manzoor ki.

Sunwai ke dauran darkhwast guzaron ke wakeel Faisal Siddiqui ne Islamabad High Court mein hone wali mukhtalif sunwaiyon ki order sheets court ke samne pesh kin aur bataya ke Supreme Court ne 12 May ko High Court ko saza muattali ki darkhwaston par do hafton mein faisla karne ki hidayat ki thi.

Wakeel ke mutabiq 12 May ke hukum ke bawajood muamla aage nahin barh saka aur Islamabad High Court mein case mutaddid martaba multawi hua.

Faisal Siddiqui ne court ko bataya ke saza muattali ki darkhwast par jald sunwai ke liye dayer darkhwast Islamabad High Court ke registrar office ne mustarad kar di thi, Faisal Siddiqui ne apne dalail mein sabiq judge Justice Asif Saeed Khosa ke ek sabiqa remark ka hawala dete hue kaha ke un ke baqaul sirf judge ya wakeel ke intiqal par hi case multawi hona chahiye.

Islamabad High Court mein case ki bar bar iltawa ka zikr karte hue Faisal Siddiqui ne kaha ke High Court mein jo kuch hua woh un ke liye surprise tha, jis par Justice Ishtiaq Ibrahim ne remarks diye ke aaj kal surprises ka daur hai.

Justice Naeem Akhtar Afghan ne zamanat manzoor karte hue kaha ke donon wakeel hain, un ki izzat rakh rahe hain, unhen bhi keh den court ke decorum ka khayal rakhen, ek wakeel mein aur ek aam aadmi mein farq hota hai.

Islamabad ki District and Session Court ne 24 January, 2026 ko Imaan Mazari aur Hadi Ali Chattha ko Social Media posts ke muqadme mein majmui taur par 17, 17 saal qaid ki saza sunai thi.

Court ne donon ko PECA ki mukhtalif dafaat ke tehat saza sunai, in mein dafa 9 ke tehat paanch saal, dafa 10 ke tehat 10 saal aur dafa 26-A ke tehat do saal qaid shamil thi.

Trial Court ke faisle ke khilaf Imaan Mazari aur Hadi Chattha ne 7 February 2026 ko Islamabad High Court se ruju kiya tha.

Islamabad High Court ne baad azan un ki saza muattali ki darkhwaston ko qabil-e-sunwai qarar diya, jis ke baad in darkhwaston par baqaida sunwai ka rasta khula, 12 May ko Supreme Court ne Islamabad High Court ko saza muattali ki darkhwaston par do hafton mein faisla karne ki hidayat ki, taham 26 May ki muqarrara muddat guzarne ke bawajood muamla zer-e-iltawa raha, baad mein Supreme Court mein dobara jald sunwai ki darkhwastein dayer ki gayin