Sindh hukumat jamiaat ke professors ki retirement ki umar 60 se barha kar 65 saal karne ka faisla

Karachi: Sindh hukumat ne soobe ki jamiaat ke professors ki retirement ki umar 65 saal karne ka faisla kiya hai.

Soobe ki 32 sarkari jamiaat ke vice chancellors ke ijlas mein Chief Secretary Sindh Asif Haider Shah ne bataya ke university professors ki retirement ki umar 60 se barha kar 65 saal karne ki summary soobai cabinet ko bheji jayegi.

Unhon ne kaha ke Sindh deegar soobon ke muqable mein jamiaat ko zyada grant-in-aid faraham karta hai aur soobe ki jamiaat ko 44 arab 460 million rupees ki grant di ja rahi hai.

Chief Secretary ne kaha ke naye campuses ke qiyam ke liye jame policy aur wazeh miyarat wazaa kiye jayen taake taleemi aur maali zaruriyat ko madde nazar rakhte hue faisle kiye ja saken.

Unhon ne mazeed bataya ke vice chancellors ne haq-e-maloomat ke qanoon ke hawale se bhi apne tahaffuzat ka izhar kiya hai. Baaz auqat aisi maloomat talab ki jati hain jin ka awami mufad se barah-e-raast talluq nahin hota.

Asif Haider Shah ne kaha ke jamiaat ke liye pension ke wajibat ek bara masla ban chuke hain. Maali bojh kam karne ke liye ghair zaroori bhartiyon, bil-khusus ghair tadrisi shobon mein bhartiyon ki hausla shikni ki jaye.