Shahid Rind ka World Development Information Day par paigham: Mustanad maloomat awam ka bunyadi haq

Balochistan: Wazir-e-aala Balochistan ke moavin barae itlaat o siyasi umoor Shahid Rind ne World Development Information Day ke mauqe par apne paigham mein kaha hai ke taraqqiyati umoor se mutaliq durust aur mustanad maloomat tak awam ki rasai un ka bunyadi haq aur shaffaf hukmarani ka aham taqaza hai. Bakhabar shehri na sirf taraqqiyati mansoobon se behtar taur par mustafid ho sakte hain balke hukumati iqdamat ki nigrani aur jawabdehi ke amal mein bhi moasir kirdar ada kar sakte hain.

Digital khwandagi aur awami shirkat

Shahid Rind ne kaha ke taraqqiyati maloomat ke hawale se awami shaoor ujagar karna aur digital khwandagi ko farogh dena waqt ki aham zaroorat hai. Jadeed digital Technology ke zariye mustanad maloomat ki barwaqt farahmi taraqqiyati mansoobon mein shaffafiyat yaqeeni banane, badunwani ki roktham aur awami falah ke samarat mustahiq afrad tak pahunchane mein moavin sabit hoti hai.

Unhon ne kaha ke taraqqiyati mansoobon ki moasir mansooba bandi aur wasail ki munsifana taqseem ke liye durust adaad o shumar aur zameeni haqaiq par mabni maloomat bunyadi ahmiyat rakhte hain. Jab awam ko taraqqiyati mansoobon ke maqasid, mukhtas wasail, pesh raft aur mutawaqqa fawaid se agah kiya jata hai to awami aitmad mein izafa hota hai aur taraqqiyati amal mein shehriyon ki shamooliyat ko farogh milta hai.

Moavin Wazir-e-aala ne kaha ke taraqqi ka haqeeqi maqsad us ke samarat muashre ke tamam tabqat, bil-khusoos pasmanda aur door daraz ilaqon ke awam tak pahunchana hai. Is maqsad ke husool ke liye zaroori hai ke taraqqiyati maloomat tak bila imtiaz rasai yaqeeni banai jaye aur awam ko jadeed zaraye iblagh ke zariye asan, qabil-e-fahm aur mustanad maloomat farahm ki jayen.

Shahid Rind ne kaha ke mehkama itlaat awam aur hukumat ke darmiyan rabte ka aham zariya hai, jo taraqqiyati iqdamat, awami falahi mansoobon aur hukumati policies se mutaliq agahi farahm karne mein kaleedi kirdar ada karta hai. World Development Information Day is azm ki tajdeed ka mauqa hai ke maloomat tak awam ki rasai ko mazeed moasir banaya jaye, digital zaraye ke musbat istemal ko farogh diya jaye aur shaffafiyat, jawabdehi aur awami shirkat ki bunyad par paidar taraqqi ki rah hamwar ki jaye.