Quetta: Giran farooshi ke khilaf karrawai, muqarrara nirkhon se zaid par aata farokht karne par 7 dealers girftar

Quetta: Deputy Commissioner Quetta West Munir Ahmed Durrani ki khusoosi hidayat par zilai intezamia ne giran farooshi ke khilaf karrawaiyan taiz kar di hain.

Is silsile mein Assistant Commissioner Brewery Kashif Amar ne Sariab Road aur Sabzal Road par mukhtalif aata dealers ki dukanon ka muainah kiya aur muqarrara nirkhon se zaid qeemat par aata farokht karne ke mamle par 7 aata dealers ko girftar kar liya.

Karrawai ka maqsad awam ko sarkari nirkhon par aate ki faraahmi yaqeeni banana aur najaiz munafa khori ki rok tham karna hai.

Zilai intezamia ne wazeh kiya hai ke ashya-e-zaroriya ki muqarrara qeematon ki khilaf warzi kisi soorat bardasht nahin ki jaye gi.

Deputy Commissioner Quetta West Munir Ahmed Durrani ki hidayat ke mutabiq giran farooshon ke khilaf bila imtiaz karrawaiyan jari rakhi jayen gi, jabke awam ko relief faraham karne aur sarkari nirkhon par ashya-e-zaroriya ki dastiyabi yaqeeni banane ke liye Price Control muhim mazeed moassir banai jaye gi.