Pasni: Assistant Commissioner ne Gurhani, Churbander Water Supply Scheme ka muaina kiya, bahali ka kaam tasalli bakhsh qarar

Pasni: Assistant Commissioner Pasni Khusro Dilawari ne SDO Public Health Engineering (PHE) Pasni ke hamrah Gurhani, Churbander Water Supply Scheme (WSS) ka mauqe par ja kar physical muaina kiya.

Daure ke douran PSDP ke tahat jari Gurhani, Churbander Pasni Water Supply Scheme ki bahali (Restoration of WSS Gurhani, Churbander, Pasni) ke tahat mukammal kiye gaye mukhtalif taraqqiyati o bahali ke kaamon ka tafseeli jaiza liya gaya, jo mujmui taur par mukammal aur tasalli bakhsh paye gaye.

Assistant Commissioner ne scheme ki takmeel, bahali ke kaamon aur mujmui soorat-e-haal ka jaiza lete hue mutaliqa hukkam se tafseelat daryaft kin. SDO PHE Pasni ne scheme ke mukhtalif ajza, mukammal kiye gaye kaamon aur maujooda soorat-e-haal par tafseeli briefing di.

Assistant Commissioner Pasni ne hidayat ki ke Water Supply Scheme ko muassir taur par faal rakhne aur shehriyon ko pani ki faraahmi yaqeeni banane ke liye zaroori iqdamat jari rakhe jayen.

Tasveer: Bashukriya DG PR Balochistan