Pasni: Assistant Commissioner Khusro Dilawari ka petrol pumps par achanak chhapa, kam eendhan dene par aik pump seal

Gwadar/Pasni: Deputy Commissioner Gwadar Naqeebullah Kakar ki khusoosi hidayat par Assistant Commissioner Pasni Khusro Dilawari ne awami shikayat ka fori notice lete hue shehr ke mukhtalif petrol pumps ka achanak muayena kiya, jis ke dauran petroleum masnuat ki muqarrara sarkari nirkhon ke mutabiq farokht, paimane aur per litre eendhan ki miqdar ka tafseeli jaiza liya gaya.

Muayene ke dauran aik petrol pump par muqarrara miqdar se kam eendhan faraham karne ki shikayat durust sabit hone par ise mauqe par seal kar diya gaya. Assistant Commissioner ne pump intezamia ko hidayat ki ke awam ko muqarrara nirkhon par durust miqdar mein eendhan ki farahmi yaqeeni banai jaye, aur paimane mein kami, zaid nirkh wasool karne ya sarifeen ko kisi bhi soorat nuqsan pahunchane ki ijazat nahin di jaye gi.

Khusro Dilawari ne petrol pump malikan ko khabardar kiya ke muqarrara nirkhon aur paimane ki khilaf warzi par bila imtiyaz qanooni karrawai hogi aur sarifeen ke huqooq ka har soorat tahaffuz kiya jaye ga.

Baad azan unhon ne Main Bazaar Pasni mein mukhtalif general stores ka muayena karke ashya-e-khurdonosh ki qeemton, miyar aur zaid-ul-miyad masnuat ki mojoodgi ka jaiza liya aur dukandaron ko miyari ashya muqarrara nirkhon par faraham karne aur zaid-ul-miyad ashya ki farokht se mukammal ijtinab ki hidayat ki. Unhon ne kaha ke najaiz munafa khori aur ghair miyari ashya ki farokht ki rok tham zilai intezamia ki awwaleen tarjihat mein shamil hai aur bazaron ki nigrani mazeed muassir banai jaye gi.

Tasweer: Bashukriya DGPR Balochistan