Quetta: Naye excise inspectors ke liye tarbiyati program, insidad-e-manshiyat ke qawanin par nashist

Quetta: Directorate General Excise, Taxation and Anti-Narcotics Balochistan, North Zone Quetta ke zer-e-ehtimam naye tainat hone wale excise inspectors ke liye pesha-warana tarbiyati program jari hai.

Tarbiyati program ke pehle roz advocate Abdul Nafey Ghayur ne insidad-e-manshiyat ke qawanin, qanooni taqazon aur manshiyat se mutaliq jaraim ki roktham ke hawale se khusoosi tarbiyati nashist munaqid ki.

Tarbiyati nashist ke dauran naye tainat excise inspectors ko manshiyat se mutaliq qawanin, un ke mouassar nifaz aur insidad-e-manshiyat ki karwaiyon mein qanooni tareeqa-e-kaar ki ahmiyat se agah kiya gaya.

Mehkama ke hukkam ka kehna tha ke tarbiyat ka maqsad afsaran ki qanooni maloomat mein izafa aur unhein field mein pesha-warana zimmedariyan mouassar andaz mein ada karne ke liye tayyar karna hai.

Director General Excise, Taxation and Anti-Narcotics ki janib se tarbiyati program mein property tax ke qawanin, intelligence aur field operations, jaraim ki tehqiqat aur crime management samet mukhtalif aham mauzoat bhi shamil hain.

Mutaliqa hukkam ka kehna tha ke mehkama excise ke is tarbiyati iqdam ka maqsad naye afsaran ki pesha-warana salahiyaton, qanooni fehm aur amli maharaton ko behtar banana hai taake woh insidad-e-manshiyat, tax qawanin ke nifaz aur deegar mehkamana umoor mein apni zimmedariyan mouassar, zimmedarana aur qanoon ke mutabiq anjam de saken.