Muqaddamat ki jald samaat ke liye sham ko bhi adalati bench baithe ga, Chief Justice

Full court ijlas se khitab karte hue Chief Justice Pakistan Yahya Afridi ne kaha hai ke muqaddamat muqarrar karne ki policy web par daal di gayi hai aur ab mere kehne par bhi koi muqaddama muqarrar nahin hota.

Chief Justice ne kaha ke yeh kaha jata hai ke judges 3 mahine ki chhuttiyan karte hain, kis ne kaha ke judges 3 mahine ki chhutti karte hain? Judges 3 mahine ke arse ke andar ek mahine ki chhutti karte hain.

Chief Justice ne bataya ke ek bench ke samne ek hi roz mein 75 muqaddamat muqarrar hue. Muqaddamat muqarrar karne ki policy web par maujood hai jabke 2 afsaran cause list mein aane wale muqaddamat ko dobara check karte hain.

Chief Justice Yahya Afridi ne kaha ke jald samaat ki darkhwaston ke liye ek bench tashkeel diya ja raha hai. Jald samaat ke muqaddamat sunne ke liye sham ke waqt bhi bench baithe ga.

Chief Justice ne mazeed kaha ke Shariat Appellate Bench har do mahine mein ek hafte ke liye baithe ga.