Mohsin Naqvi ka National Police Academy ka daura, upgradation projects mukammal karne ki hidayat

Wafaqi wazir-e-dakhila ne zer-e-tarbiyat afsaran ke liye tayyar kiye gaye model rooms ka bhi daura kiya, is mauqe par un ki zer-e-sadarat ijlas hua jis mein National Police Academy ke upgradation projects par pesh raft ka jaiza liya gaya.

Mohsin Naqvi ne conference room aur auditorium ki az sar-e-nau tameer ki hidayat karte hue kaha ke tamam projects muqarrara muddat mein mukammal planning aur aala miyar ke mutabiq mukammal kiye jayen.

Unhon ne kaha ke wazir-e-mumlikat for interior National Police Academy ke upgradation projects ka rozana ki bunyad par jaiza le rahe hain.

Wafaqi wazir-e-dakhila ne zer-e-tarbiyat afsaran ko SWAT teams ke tarz ke jadeed tarbiyati aalat faraham karne ki bhi hidayat ki, jabke Mid Career Management course ke liye behtareen aur maahir faculty ki khidmat hasil karne ki hidayat bhi ki gayi.

Ijlas mein MCMC ke nisab mein digital policing aur Artificial Intelligence ke jadeed modules shamil karne ki sifarish karne ka faisla kiya gaya.

Mohsin Naqvi ne kaha ke police afsaran ki tarbiyat ko waqt ke taqazon se hum ahang karna police force ke miyar ko mazeed behtar banane ke liye intihai zaroori hai, daure ke mauqe par commandant National Police Academy, CDA ke afsaran aur deegar mutaliqa hukkam bhi mojood the.