Kech: Assistant Commissioner Nadeem Iqbal Bangulzai ka Bahman Turbat ka daura, Tajawuzat ke khatme ki hidayat

Turbat: Deputy Commissioner Kech Yasir Iqbal Dashti ki khusoosi hidayat par zilai intizamia Kech ki janib se shehr mein Tajawuzat ke khatme aur shehri nazm-o-zabt barqarar rakhne ke liye iqdamat jari hain.

Is silsile mein Assistant Commissioner Nadeem Iqbal Bangulzai ne Bahman Turbat ka daura kiya aur Tajawuzat se mutaliq soorat-e-haal ka jaiza liya.

Daure ke dauran Assistant Commissioner ne tajawuz shuda maqam ka moayena kiya aur mutaliqa malik ko hidayat ki ke woh razakaranah taur par 24 ghanton ke andar Tajawuzat khatam kare takay shehriyon ko amad-o-raft mein darpesh mushkilat ka izala kiya ja sake aur ilaqay mein nazm-o-zabt barqarar rakha ja sake.

Is moqay par Municipal Committee ke amle ko bhi wazeh hidayat jari ki gayin ke muqarrara muddat ke andar Tajawuzat khatam na kiye jane ki soorat mein 24 ghante baad qanoon ke mutabiq zaroori karrawai amal mein late hue Tajawuzat ka khatma yaqeeni banaya jaye.

Shehri qanoon ki amal daari

Deputy Commissioner Kech Yasir Iqbal Dashti ki qiyadat mein zilai intizamia ki janib se shehri masail ke hal, sarkari o awami maqamat ko Tajawuzat se paak rakhne aur shehri sahuliyat ki behtari ke liye amali iqdamat qabil-e-sitayish hain. Zilai intizamia is azm ke sath kaam kar rahi hai ke shehri ilaqon mein qanoon ki amal daari barqarar rakhi jaye aur awam ko behtar shehri mahaul faraham kiya ja sake.