Kalanch ke Government Boys Middle School Bill Hadoki mein projector aur Multimedia ke zariye jadeed tadrees ka aghaz

Kalanch: Hukumat-e-Balochistan ki Taleem dost policy aur talba ko miyari o jadeed Taleem ki faraham ke liye jari iqdamat ke tehat Government Boys Middle School Bill Hadoki, Kalanch mein jadeed tadreesi nizam mutaarif kara diya gaya, jahan talba ko projector aur bari screen ke zariye tadreesi amal se roshnas karaya ja raha hai.

Is iqdam ke tehat school mein Multimedia based tadrees ka aghaz kiya gaya hai, jis se talba ko rawayati tariqa-e-tadrees ke sath jadeed aur basri andaz mein taleemi mawad tak rasai hasil hogi. Is hawale se school ke head master Qarar Umar ki kawishein qabil-e-zikr hain.

School intizamia ne kaha ke jadeed Technology ko tadreesi amal ka hissa banane ka maqsad talba ki taleemi istedad, takhliqi salahiyaton aur seekhne ke amal ko mazeed muassir banana hai.

Baghair kisi sarkari maali muavanat ke mukammal hone wala yeh iqdam is baat ki akkasi karta hai ke taleemi idare, asatiza aur muashre ke bashaur afrad mushtaraka kawishon se talba ke liye behtar taleemi mahaul tashkeel de sakte hain. Hukumat-e-Balochistan ki janib se miyari Taleem, jadeed tadreesi sahuliyat aur nojawan nasl ko mustaqbil ke taqazon se hum aahang karne par khusoosi tawajjo di ja rahi hai, aur is school mein jadeed tadreesi nizam ka aghaz isi taleemi vision ki amali misal hai.

Tasveer: Bashukriya DG PR Balochistan