Girls High School Shambe Ismail ki talibaat ka Gwadar Port aur CBC Business Center ka mutalaati daura

Gwadar: Amali taleem, mushahide aur jadeed maloomat se talba ko roshnas karane ke hukumati vision ke tahat Government Girls High School Shambe Ismail Gwadar ki talibaat ko Gwadar Port aur CBC Business Center ka mutalaati daura karaya gaya, jis ka maqsad talibaat mein tehqeeq, mushahide aur seekhne ka jazba ujagar karna aur unhein Gwadar ki maashi o tijarati ahmiyat aur mustaqbil ke mawaqe se aagah karna tha.

Maroof karobari shakhsiyat Mir Farooq Ghafoor Kalmati ke taawun aur sarparasti mein aur school ki Head Mistress Balqees Suleman ki sarparasti mein hone wale is daure mein talibaat ne Gwadar Port ke mukhtalif hisse dekhe aur port ki sargarmiyon, tijarat aur mulki maeeshat mein is ke kirdar ke bare mein maloomat hasil keen.

Talibaat ne CBC Business Center ka bhi daura kiya jahan Khalil Ahmed ne unhein karobari sargarmiyon, tijarat aur maashi mawaqe par briefing di. Talibaat ne sawalat kiye aur amali maloomat hasil keen, jabke Mir Farooq Ghafoor Kalmati ki janib se un ke liye khusoosi refreshment aur tohfon ka ehtimam kiya gaya.

Talibaat ne daure ko mufeed aur malumati tajurba qarar dete hue kaha ke is se unhein kitabi ilm ke sath apne ilaqe ki maashi o tijarati ahmiyat samajhne ka mauqa mila. Head Mistress Balqees Suleman aur talibaat ne daure ke inaqad, mezbani, refreshment aur tohfon par Mir Farooq Ghafoor Kalmati ka shukriya ada kiya.

Tasveer: Bashukriya DGPR Balochistan