Dr Najeeb Naqi Azad Jammu o Kashmir ke 23 wein sadr muntakhib

Sadarti intikhab ke liye polling Azad Jammu o Kashmir Legislative Assembly Secretariat mein hui, jis ke baad votun ki ginti mukammal hone par Dr Muhammad Najeeb Naqi Khan ki kamyabi ka elan kiya gaya, 46 rukni aiwan mein speaker Chaudhry Tariq Farooq ne bhi apna vote cast kiya, jabke Peoples Party ke rukn assembly Chaudhry Qasim Majeed ki adam moujoodgi ke baais un ka vote shumar na ho saka.

‎Dr Najeeb Naqi ka intikhab nayi muntakhib hukumat ke qayam ke baad aham aini ohdon ki tashkeel ke silsile ki takmeel bhi hai, is se qabl Muslim League (N) ke umeedwar Iftikhar Gilani wazir-e-azam Azad Kashmir muntakhib hue the jabke Chaudhry Tariq Farooq ne speaker Legislative Assembly ka mansab sambhala tha.

‎Sadarti intikhab ke liye Election Commission Azad Kashmir ne Dr Muhammad Najeeb Naqi Khan aur Chaudhry Latif Akbar ke kaghazat-e-namzadgi manzoor kiye the, polling ke baad votun ki ginti returning officer ki nigrani mein mukammal ki gayi.

‎Dr Muhammad Najeeb Naqi Khan ki kamyabi ke sath Azad Kashmir mein sadr ke ohde par nayi muddat ka aghaz ho gaya hai, Dunya News ne 28 August ko Dr Najeeb Naqi ke sadr banne ki khabar break ki thi jo aaj 24 roz ke baad Dr Najeeb Naqi ke sadr muntakhib hone ke baad durust sabit hui.

‏‎Dr Muhammad Najeeb Naqi Khan ke sadr muntakhib hone ki surat mein Poonch Division ko riyasti hukumat ke aham aini ohdon mein numainda-gi milegi, sadarti intikhab ke baad Rawalakot aur Sudhnoti ki saat nashiston par hone wale aainda intikhabat bhi Azad Kashmir ki siyasat mein aham pesh-raft hongi aur sadarti intikhab jeetne ke baad election mein N league ki position mazeed behtar ho jayegi.