Wazir-e-azam khusoosi relief scheme ka poore Pakistan mein kamyab ijra

Wazir-e-azam Muhammad Shehbaz Sharif ne mulk bhar se scheme se mutaliq mausool hone wali aaraa ki roshni mein ek aur aham faisla kiya hai, wazir-e-azam ki hidayat par paanch litre se kam petrol dalwane wale motorcycle, chang chi aur rickshawon ko bhi ek token par ek hafte mein 500 rupay ki riayat milegi.

Haftawar ek token jari kiya jayega aur ek mahine mein majmooi taur par 4 token jari kiye jayenge.

Scheme mein 800 cc tak gaari istemal karne wale pehle ki tarah har 10 roz mein 10 litre petrol par 100 rupay per litre ki riayat hasil karenge, yun ek mahine mein 10 litre ke 3 token jari karne ka silsila bhi chalta rahega.

Wazir-e-azam Shehbaz Sharif ne is se qabl scheme se relief hasil karne ke ahal afrad ke liye registration message ko bilkul muft karne ka elan kiya tha.

Wazir-e-azam ne fuel relief scheme mein 20 saal purani motorcycleon, rickshawon aur chang chi rickshawon ko shamil karne ki hidayat ki thi, jis par amalderamad shuru kar diya gaya hai.

Yakum January 2006 ke baad registered tamam motorcycleen, rickshaw aur chang chi wazir-e-azam fuel relief scheme mein registration ke liye ahal ho gaye hain.

Wazir-e-azam Muhammad Shehbaz Sharif relief scheme ki har pehlu se nigrani khud kar rahe hain. Wazir-e-azam ne scheme se mustafid hone walon ka daira kaar wasee aur petrol par riayat ki baizzat o baaasani aur bila rukawat faraahmi ko yaqeeni banane ki hidayat ki hai.