Field Marshal Asim Munir ka Peshawar Corps Headquarters ka daura, dehshatgardon ke khilaf muhim jari rakhne ka elan

Peshawar: Army chief wa Chief of Defence Forces Field Marshal Syed Asim Munir ne Corps Headquarters Peshawar ka daura kiya, jahan unhein maujooda security surat-e-haal, insidad-e-Dehshatgardi ki jari karwaiyon, border management ke iqdamat aur soobe mein taynaat formations ki operational tayyariyon par briefing di gayi.

ISPR ke mutabiq Peshawar pahunchne par Corps Commander Peshawar ne army chief ka istaqbal kiya.

Field Marshal ne afsaran aur jawanon ke aala hausle aur peshawarana maharat ko saraha. Unhon ne hidayat ki ke khatraat ka muassir tareeqe se muqabla karne ke liye chowkas raha jaye aur operational tayyari ka aala miyar barqarar rakha jaye.

Unhon ne zor de kar kaha ke sponsored dehshatgard tanzeemon ke khilaf muhim bharpoor tareeqe se jari rakhi jayegi aur woh jahan kahin bhi hongi, unhein bharpoor andaz mein nishana banaya jayega.

Security forces ke shuhada aur ghaziyon samet Pakistani awam ki qurbaniyon ko kharaj-e-tehseen pesh karte hue Field Marshal ne eaadah kiya ke awam ki himayat se Pakistan dehshatgardon aur un ke bigre hue nazriyat ko zaroor shikast dega.