Sadr Zardari ki German sadr Steinmeier se Berlin mein mulaqat, dotarfa taawun barhane par ittefaq

Berlin: Sadr-e-mamlikat Asif Ali Zardari ne German sadr Frank-Walter Steinmeier se mulaqat ki, jis mein Pakistan aur Germany ke darmiyan dotarfa taawun aur shirakat daari ko wusaat dene par zor diya gaya. Mulaqat one-on-one hui, jis ke baad wufood ki satah par muzakraat bhi hue.

Anadolu Agency ke mutabiq German sadr ne jumme ko sadr Zardari ka fauji aizaz ke sath istiqbal kiya. Aiwan-e-sadr Pakistan ke mutabiq sadr Zardari ko guard of honour bhi pesh kiya gaya. Sadr Zardari Steinmeier ki dawat par 22 se 24 October tak Germany ke teen roza daure par hain. Is dauran woh Germany ki aala qiyadat aur karobari numainDon se bhi mulaqatein karenge.

Express Tribune ne Aiwan-e-sadr ke bayan ke hawale se bataya ke sadr Zardari ne siyasi, iqtisadi aur difai taawun ki mojooda salahiyat se faida uthane ki zaroorat par zor diya. Unhon ne tijarat, ubharti hui technologies, mausamiyati tahaffuz, hunarmandi ki taraqqi aur awami o saqafati rawabit par khusoosi tawajjoh dene ki baat ki. Unhon ne kaha ke Pakistan Germany ko aham European shirakat daar samajhta hai aur science ki taraqqi, sehat, taleem, tijarat aur sarmaya kari samet shobon mein taawun barhana chahta hai. Sadr Zardari ne German sadr ko daura-e-Pakistan ki dawat bhi di.

Sadr Zardari ne America aur Iran ke tanaze mein Pakistan ke mukhlisana salsi kirdar ko tasleem karne par Germany ka shukriya ada kiya aur kaha ke Pakistan ilaqai o alami aman o istehkam ke liye muzakraat ka hami hai.

Steinmeier ne safarti taalluqat ki 75wein salgirah ke mauqe par daure ka khair maqdam kiya aur umeed zahir ki ke donon mumalik tijarat, taleemi ishtirak aur Technology ke shobon mein koshishein tez karenge. Unhon ne ilaqai o alami tanazaat ke hal mein Pakistan ke safarti kirdar ko saraha. Express Tribune ke mutabiq unhon ne Peshawar mein school ki chhat girne se bachon ki amwat par taziyat bhi ki. Mulaqat mein Afghanistan se mutaliq challenges par bhi tabadla-e-khayal hua.

German sadr ki tarjuman Christen Gamelin ke mutabiq donon sudoor ne tijarat aur sarmaya kari ki tausee aur khitte ki soorat-e-haal par baat ki. Anadolu ke mutabiq Germany European Union mein Pakistan ka sab se bara tijarati shirakat daar hai. Yeh 23 saal baad kisi Pakistani sarbarah-e-mamlikat ka Germany ka pehla daura hai. Donon mumalik ke safarti taalluqat 1951 mein qaim hue the.