Turkey ne Pakistan aur Saudi Arabia ke sath Makkah mushtarka difai ittehad tauseeq ke liye parliament mein pesh kar diya

Ankara: Turkey ne Pakistan aur Saudi Arabia ke sath tay pane wala Makkah mushtarka difai ittehad tauseeq ke liye parliament mein pesh kar diya hai. Khabar rasaan idare Reuters ne mangal ko teen parliamani zarae ke hawale se yeh ittela di.

Teenon mumalik ne is muahide par August mein dastakhat kiye the. Reuters ke mutabiq is iqdam se NATO ki doosri badi fauj rakhne wala mulk Turkey, Riyadh ke sath baqaida bahmi difai wabastagi ke qareeb pahunch gaya hai, jabke Saudi Arabia ko Houthi hamlon ka samna hai. Idare ke mutabiq muahida ibtidai 10 baras ke liye teenon mumalik par lazim hoga.

Muahide ke tahat kisi ek rukn mulk par musallah hamla tamam arkan par hamla tasawwur hoga aur fareeqain bairooni jarehiyat ke khilaf ek doosre ki madad ke paband honge. Reuters ke dekhe gaye matan ke mutabiq pehli shiq mein kaha gaya hai ke fareeqain ek doosre ki ilaqai salamati, khudmukhtari ya International tor par tasleem shuda sarhadon ko lahiq khatrat khatam karne ke liye har zaroori zariya istemal karenge.

Doosri shiq ke mutabiq kisi mulk ya mumalik ke giroh ki janib se kisi fareeq par musallah hamle ya fauji jarehiyat ki soorat mein baqi fareeq dastiyab tamam bahmi imdadi iqdamat burooe kar late hue fori madad faraham karenge. Yeh shiq NATO ke article 5 se mushabeh hai.

Doosri janib Muslim Institute ne Jhang mein darbar Hazrat Sultan Bahu par Pakistan, Saudi Arabia aur Turkey ke ittehad aur Muahida Makkah ki alamat ke taur par insani tashkeel ka ehtimam kiya, jis mein hazaron afrad shareek hue. Is mauqe par teenon mumalik ke parcham lehraye gaye, qaumi tarane bajaye gaye aur «Islam aman hai» ke nare lagaye gaye.