Taxila mein TikTok star Shamsu Bibi ka qatl: baap aur bhai samet 5 mulzimaan giraftar

Taxila mein Social Media personality Shamsu Bibi urf Ayesha Gulmina ke andhe qatl ka muamma hal kar liya gaya, police ne baap aur bhai samet 5 mulzimaan ko giraftar kar liya.

SSP Operations Malik Tariq Mehboob ne press conference karte hue bataya ke police ne 100 se zaid CCTV cameras ki madad aur human intelligence ke zariye mulzimaan tak rasai hasil ki.

SSP Operations ke mutabiq mulzimaan ne qanoon ko dhoka dene ke liye qatl ke baad drama rachane ki koshish ki, taham police ne shawahid aur tafteesh ki roshni mein paanchon mulzimaan ko giraftar kar liya.

Ibtidai tehqiqat ke mutabiq Shamsu Bibi urf Ayesha Gulmina ko mubayyna taur par ghairat ke naam par qatl karwaya gaya.

SSP Operations ka kehna tha ke muqadma ka mudai walid bana aur do mulzimaan ko namzad kiya, waqie mein zakhmi hone wali maqtula ki behan se bhi poochh gachh ki, khatoon ke qatl mein us ki family ke afrad shamil hain.

Unhon ne bataya ke muqadma ke mudai ne qatl ka aitraf kiya hai, bohat kam hota hai ke mulzim khud hi mudai bane, maqtula ki Social Media par mojoodgi ko khandan wale pasand nahin karte the, mudai ki haisiyat ab mulzim ki ban gayi hai.

Police hukkam ka kehna hai ke waqie ki mazeed tehqiqat jari hain jabke giraftar mulzimaan se tafteesh ke zariye qatl ke deegar mehrikat aur tafseelat samne laayi ja rahi hain.