Sadia Imam ka saathi adakaron ki janib se dhoka diye jane ka inkishaf

Sadia Imam ne yeh inkishaf nijji TV ke morning show mein guftagu ke dauran kiya.

Apne tajurbat bayan karte hue Sadia Imam ne kaha ke jab mein ne Showbiz industry mein qadam rakha to us waqt khawateen adakaraon ki tadad bohat kam thi, industry mein zyada tar ya to bohat senior adakarayen thin ya phir bilkul nayi aur junior adakarayen, jabke meri hum umr aur hum palla khawateen fankar bohat kam thin.

Sadia Imam ne bataya ke us waqt mere zyada tar saathi mard the aur mujhe unhi mein se baaz qareebi doston ki janib se dhoka mila, chand mawaqe par sathiyon ne mujhe peeth peechhe nuqsan pahunchaya aur mere khilaf baatein kin.

Adakara ne bataya ke mere walid mujhe hamesha mashwara dete the ke jaali dost rakhne se behtar hai ke insan akela rahe, taham us waqt mujhe walid ki baat samajh nahin aati thi kyunke mujhe logon ki zaroorat mehsoos hoti thi.

Sadia ke mutabiq waqt ke saath mein ne in tajurbat se bohat kuch seekha aur Allah ke fazl se woh mushkil waqt guzar gaya.

Sadia Imam ne inkishaf kiya ke kai martaba mein ne apne mard sathiyon ko mujh se mutaliq baat karte hue khud suna, baaz log kehte the ke Sadia Imam ko cast na kiya jaye kyunke woh party girl nahin hain aur shooting ke dauran zyada ghulti milti nahin.

Adakara ne bataya ke us zamane mein dramon ki shooting ke liye biron-e-mulk bhi jana hota tha aur baaz sathiyon ko mere rawaiye aur tarz-e-zindagi se masla tha, kuch log aisi ladkiyon ko apne saath rakhna chahte the jo un ke saath zyada dostana hon, isi wajah se mujhe baaz projects se nikal diya jata ya phir doosre darje ke kirdar diye jate the.

Sadia Imam ne kaha ke mujhe sab se zyada dukh un logon ke rawaiye se hua jo mere intehai qareebi saathi the, mere ghar aate jate, saath khana khate aur waqt guzarte the, lekin pas-e-parda mere khilaf baatein karte rahe.