Quetta: Governor Jafar Khan Mandokhail ka pehli Balochistan Food numaish ka iftitah, Balochistan poore mulk ki ghizai zarooriyat poori kar sakta hai

Quetta: Governor Balochistan Jafar Khan Mandokhail ne kaha hai ke Balochistan jughrafiyai aitbar se Zaraat, livestock aur mahi geeri ke liye zyada mauzoon khitta hai. Zaraat aur maldari yahan ke awam ke aham maashi zaraye hain. Balochistan poore Pakistan ki ghizai zarooriyat poori karne ki salahiyat rakhta hai.

Unhon ne kaha ke zarurat is amr ki hai ke Zaraat, livestock aur mahi geeri ke shobon ko jadeed scientific khutoot par ustawar kiya jaye aur maqami kashtkaron, maldaron aur mahi geeron ko jadeed technology, wasail aur bunyadi sahuliyat tak rasai faraham ki jaye.

Pakistan khaskar Balochistan ke mewa jaat aur ghizai masnuat meyar, zaiqe aur qudrati khususiyat ke aitbar se International satah par zyada pasand kiye jate hain. Lihaza zaroori hai ke unhein International mandiyon mein mutaaruf karaya jaye taake maqami maeeshat mazboot ho aur rozgar ke naye mawaqe paida hon.

Yeh baat unhon ne World Food Day ki munasibat se Aqwam-e-Muttahida ke zaili idare Food and Agriculture Organization ke zere ihtimam munaqida pehli Balochistan Food numaish ka iftitah karte hue kahi. Is mauqe par FAO sub office ke head Waleed Mehdi, BUITEMS University ke vice chancellor Dr Khalid Hafeez, Zarai college ke principal Dr Shahenshah Khan samet Zaraat ke mahireen aur naujawanon ki badi tadad maujood thi.

Livestock aur sahili patti ke imkanat

Governor ne kaha ke pehli Balochistan Food numaish 2026 ke iftitah aur Aalmi Yaum-e-Khorak ki taqreeb, in do aham mawaqe par aap ke darmiyan maujood hona mere liye baais-e-izaz hai. Balochistan bunyadi taur par maldari aur gala bani ka khitta hai, jahan wasi charagahein maujood hain aur livestock ki paidawar aur ghizai masnuat ki baramadat ke be panah imkanat pae jate hain.

Unhon ne kaha ke hamara livestock ka shoba dehi maeeshat ke mazboot tareen sutoonon mein se ek hai. Zhob division, apni wasi monsoon charagahon aur maal maweshi ke qeemti wasail ke sath, hamare soobe ki is salahiyat ki ek numayan misal hai. Sirf is division ke maweshi Saudi Arabia mein taqriban 25 lakh hujjaj-e-kiram ki ghizai zarooriyat poori karne ki salahiyat rakhte hain. Hamein maldari ke rawayati tariqon ko ek jadeed, paidawari aur baramadat par mabni sanat mein tabdeel karna hoga.

Governor Mandokhail ne kaha ke isi tarah Gwadar aur Makuran ki tawil sahili patti paidar mahi geeri, samandari khorak ki processing, abi Zaraat aur samandar se wabasta sanaton ke liye be panah mawaqe faraham karti hai. Hamare sahili ilaqon ke logon ko is shobe mein qeemti tajurba aur maharat hasil hai.

Zaraat aur Food numaish

Unhon ne kaha ke Zaraat bhi Balochistan ki maeeshat ka ek aham shoba hai. Hamara soba aala meyar ke zaitoon, saib, angoor, cherry, anar aur khajoor samet mukhtalif aqsam ke phalon ke liye mashhoor hai. Loralai ke zaitoon ka International satah par ek aala meyar hai. In masnuat mein mulki aur International mandiyon mein numayan maqam hasil karne ki bharpoor salahiyat maujood hai.

Cold storage, jadeed packaging, food processing aur naql o hamal ki sahuliyat ko farogh de kar hum faslon ki bardasht ke baad hone wale nuqsanat mein numayan kami la sakte hain aur kashtkaron ki amdani mein izafa kar sakte hain.

Governor Balochistan ne kaha ke Aalmi Yaum-e-Khorak hamein yaad dilata hai ke duniya bhar mein lakhon afrad ab bhi bhook, ghizai qillat aur mutawazin khorak tak rasai ki kami jaise masail ka samna kar rahe hain. Is zimn mein pehli Food numaish mahaz zarai masnuat ki numaish nahin balke ek aisa mauassir platform hai jo kashtkaron, muhaqqiqeen, sarmaya karon, policy sazon aur sarifeen ko ek jagah jama karta hai.

Unhon ne kaha ke aaj ki yeh numaish ek mustaqil platform ki shakl zaroor ikhtiyar karegi. Is ke liye FAO ke muntazimeen aur numaish mein hissa lene wale khiraj-e-tehseen ke mustahiq hain. Unhon ne yaqeen zahir kiya ke aaj ki taqreeb aur numaish hamare soobe aur Pakistan ke liye nai sarmaya kari aur amli iqdamat ke ek naye daur ka aghaz sabit hogi.

Akhir mein Governor Balochistan ne pehli Food numaish 2026 mein lagaye gaye stalls ka muaina kiya.

Tasveer: Bashukriya DGPR Balochistan