Pakistan Navy ki maritime mashq ‘Sea Spark 2026’ Karachi mein shuru

ISPR ke mutabiq Naval Chief ne mashq se mutalliq iftitahi briefing ki sadarat ki, ‘Sea Spark 2026’ ke dauran Pakistan Navy ki jangi taiyaron ko bharpoor andaz mein aazmaya jayega jabke riwayati aur ubharte hue behri khatraat se nimatne ke liye behriya ki salahiyaton ko bhi jancha jayega.

Mashq mein behri jahaz, aabdozein, tayyare aur baghair pilot nizam hissa le rahe hain, jabke Marines aur Special Forces samet Pak Army aur Pak Air Force ke dastay bhi mashq ka hissa hain.

ISPR ke mutabiq mashq ke dauran maritime, fazai, zameeni, cyber aur khalai salahiyaton ka murabbat istemal kiya jayega, ‘Sea Spark 2026’ ka maqsad multi-domain operations ki mashq aur mukhtalif shobon mein faisla kun bartari hasil karna hai.

Mashq mein information mahaul mein operations par bhi khusoosi tawajjoh di ja rahi hai, jabke Naval Chief ne security mahaul mein tabdeeli ke paish-e-nazar moassir jangi taiyari barqarar rakhne par zor diya.

Naval Chief ne teenon musallah afwaj ke darmiyan murabbat taawun mazeed barhane ki hidayat karte hue physical aur information domains mein moassir karrawaiyon ki salahiyat barqarar rakhne ki ahmiyat par bhi zor diya.