Pakistan aur Malaysia mein saqafati tabadle aur mushtarka film sazi hogi: Malaysian Consul General

Karachi: Pakistan aur Malaysia ke darmiyan saqafati tabadlon aur mushtarka film sazi ke farogh par khusoosi tawajjoh di ja rahi hai, taake donon islami mumalik ke awami aur saqafati rawabit ko mazeed mazboot banaya ja sake.

In khayalat ka izhar Malaysia ke Consul General Muhammad Younus Ibrahim ne maqami hotel mein Pakistan aur Malaysia ke taluqat ke hawale se mon’aqida taqreeb se bataur mehman-e-khusoosi khitab karte hue kiya.

Donon mumalik mushtarka tor par aisi filmein aur drame banane ke imkanat par kaam kar rahe hain, jo donon khitton ki mushtarka iqdar, tareekh aur saqafat ki akkasi karein.

Is silsile mein Pakistan aur Malaysia ke fankaron, film sazon aur musannifin ko ek doosre ke mumalik ke daure karne aur apne tajurbat ka tabadla karne ke mawaqe bhi faraham kiye jayenge.

Consul General Muhammad Younus Ibrahim ne bataya ke rawan baras December se Malaysian Airlines Karachi ke liye apni parwazon ka aghaz karegi.

Is iqdam ka maqsad donon mumalik ke darmiyan karobari sargarmiyon, awami rawabit aur siyahat ko farogh dena hai.