Netanyahu ki nai qaumi salamati policy jari, naqshe mein Pakistan, Turkey aur Saudi Arabia ‘Sunni Diamond Alliance’

Yerusalem: Israeli wazir-e-azam Benjamin Netanyahu ke daftar ne aam intikhabat se nau din pehle itwar ko qaumi salamati ki nai doctrine shaya ki. Dastavez Israel ki qaumi salamati council ki moawinat se tayyar hui. BBC Urdu ke mutabiq is ke sath jari naqshe mein khitte ke mumalik ko ittehadi aur harif ke taur par dikhaya gaya hai.

Policy mein khatraat ko mehdood rakhne aur difa par inhisar ke bajaye rok tham aur peshgi hamle ko tarjih di gayi hai. Peshgi fauji karwai aur sarhad par 'buffer zones' ko bazabta taur par qaumi salamati policy ka hissa banaya gaya hai. Aslaha o gola barood mein khud inhisari, jadeed Technology mein bartari aur yahud mukhalif rujhanat ke khilaf jaddojehad tez karna bhi ahdaf mein shamil hain.

Naqshe mein Israel aur UAE ko 'Hexagon Alliance' ka hissa dikhaya gaya hai, jis ke sath Greece, Ethiopia aur India ke baaz hisse bhi mansalik hain. Misr aur Urdun ko Israeli ittehadi nahin dikhaya gaya. Misr ko Pakistan, Turkey aur Saudi Arabia ke 'Sunni Diamond Alliance' ka hissa jabke Urdun ko is ka dost zahir kiya gaya hai. Makkah ittehad mein fi alhal sirf Pakistan, Turkey aur Saudi Arabia shamil hain.

Hizb-e-ikhtilaf ke rahnuma Gadi Eisenkot ne is nazariye ko 'khokhla' kaha aur sawal uthaya ke yeh intikhabat se nau din qabl kyon pesh kiya gaya. Sabiq wazir-e-azam Yair Lapid ke mutabiq yeh dastavez haqiqi hikmat-e-amli nahin. Dono rahnumaon ka ilzam hai ke is ka maqsad 7 October ke hamle ko na rok sakne ki nakami chhupana hai.

Dusri janib DG ISPR Lieutenant General Ahmed Sharif Chaudhry ne Independent Arabia ko bataya ke Pakistan Saudi Arabia ko zaroori fauji moawinat faraham kar raha hai aur Makkah muahide ke tahat rukn mumalik ke khilaf jarihiyat ka ijtimai jawab diya jayega.