Mehrunnisa Iqbal ka senior actress ke naarwa salook ka inkishaf

Mehrunnisa Iqbal ne bataya ke main corona ke dinon mein ek drama ki shooting mein masroof thi, is dauran mera mamool intehai masroof tha aur main apne ahl-e-khana ko bhi bahut yaad kar rahi thi.

Actress ke mutabiq ek roz tabiyat nasaz hone par main ne producers se darkhwast ki ke mere check up ke liye gaari ka intezam kiya jaye, waqfe ke dauran main check up ke liye gayi.

Mehrunnisa Iqbal ne bataya ke set par wapsi ke baad ek senior actress ne mujh se tabiyat ke bare mein daryaft kiya to main ne jawab mein apni tabiyat aur check up ke bare mein bataya.

Actress ke mutabiq senior actress ne yeh sun kar shadeed redd-e-amal ka izhar kiya aur kaha ke tumhein corona hai aur tum ne set par mujhe gale bhi lagaya tha, jis ke baais mumkin hai ke main bhi corona se mutasir ho gayi hoon.

Mehrunnisa Iqbal ka kehna hai ke is rawaiye se mujhe bahut dukh hua, khusoosan us waqt jab main pehle hi musalsal kaam, thakan aur ghar walon se doori ke baais zehni dabao ka shikar thi.

Unhon ne bataya ke baad azan drama ke producers ne is waqiye par mujh se maazrat ki aur senior actress ke rawaiye par afsos ka izhar kiya.