Makkah par drone hamle ki koshish qabil-e-mazammat, Haramain Sharifain ke tahaffuz ke liye Saudi Arabia ke saath hain: wazir-e-azam

Samaji rabte ki website X par jari apne ek bayan mein wazir-e-azam Shehbaz Sharif ka kehna tha ke Pakistan ke awam is ishtial angez harkat par ranjeeda aur fikarmand hain, is qabil-e-mazammat aur na-qabil-e-mafi fail par hamein jis gehre dukh aur sadme ka samna hai, ise bayan karne ke liye alfaz nakafi hain.

Unhon ne kaha ke hum Shahi Saudi musalah afwaj ki ghair mamooli mustaidi, bahaduri aur pesha warana maharat ko kharaj-e-tahseen pesh karte hain jinhon ne barwaqt aur bahadurana karwai ki.