Mahwish Hayat: Nijji zindagi nijji rakhni chahiye, doosre fankar bhi mujh se seekhen

Karachi: Adakara Mahwish Hayat ne apni nijji zindagi ko Social Media se door rakhne ki wajah batate hue deegar fankaron ko bhi Social Media se door rehne ka mashwara diya hai.

Un ka kehna hai ke nijji zindagi ko mehdood andaz mein share karna ghair zaroori tanaza’at se bachne ka ek tareeqa bhi hai.

Aik program ke dauran nawjawan fankaron ko mashwara dete hue unhon ne kaha ke mujhe Social Media par bohat zyada posts karne ka kabhi shauq nahin raha aur main apni nijji zindagi ko nijji hi rakhna pasand karti hoon.

Adakara ne kaha ke doosre fankar bhi mere is tarz-e-amal se seekh sakte hain. Un ke mutabiq aik fankar ki shakhsiyat mein waqar aur tajassus ka unsar barqarar rehna chahiye, is liye Instagram par apni zindagi ke har pehlu ko zaroorat se zyada share karne se gurez karna chahiye.

Mahwish Hayat ne mashwara diya ke zindagi ke kuch muamlat apne tak mehdood rakhen aur rozmarra pesh aane wali har baat Social Media par post na karen.