JSMU ke talba ne chhe zabanon mein tibbi tareekh lene ki handbook tayyar kar li

Karachi: Jinnah Sindh Medical University (JSMU) ke talba ne chhe zabanon mein tibbi tareekh lene ki handbook mutaruf kara di, jis ka maqsad mukhtalif ilaqai zabanein bolne wale mareezon aur tibbi amle ke darmiyan rabte ki rukawatein door karna aur durust tashkhees mein madad faraham karna hai.

Handbook Sindh Medical College ke Internal Medicine Interest Group ke tehat tayyar ki gayi hai, jis mein angrezi, Urdu, Sindhi, Pashto, Punjabi, Balochi aur Saraiki zabanon ko shamil kiya gaya hai.

Yeh muft digital waseela tibbi talba ko mareezon ki alamaat samajhne, un se mauassar guftagu karne aur tibbi tareekh durust taur par hasil karne mein madad faraham karega.

Mansooba shobah pathology ki associate professor Dr Sadaf Razzaq aur principal Sindh Medical College Professor Dr Ambreen Usmani ki nigrani mein mukammal kiya gaya.

Handbook ki tayyari mein Sri Lanka se talluq rakhne wale MBBS final year ke talib-e-ilm aur Internal Medicine Interest Group ke sabiq sadr Abdul Tawab Ishaq ne kaleedi kirdar ada kiya.

Taqreeb mein izhar-e-khayal

JSMU ke vice chancellor Professor Dr Amjad Siraj Memon ne kaha ke handbook ki tayyari ka bunyadi maqsad tibbi mahol mein zabaan ki rukawatein door karna aur mukhtalif lisani pas manzar rakhne wale mareezon ke sath zyada wazeh aur mauassar rabte ko mumkin banana hai.

Sri Lanka ke consul general Sanjeewa Pativila ne Abdul Tawab Ishaq ki kawish ko sarahte hue kaha ke un ka kaam is baat ki akkasi karta hai ke ilm ka husool aur insaniyat ki khidmat qaumi sarhadon ki paband nahin.

Taqreeb mein College of Physicians and Surgeons Pakistan (CPSP) ki director Dr Sehar Abbasi ne bhi shirkat ki.

Talba ke mutabiq handbook muft download ke liye online dastiyab hai aur ise JSMU ki website se download kiya ja sakta hai.