Janubi Kashmir: Islamabad ke hospital mein cancer ke 3 hazar mareez radiotherapy se mehroom

Srinagar: Ghair qanooni tor par Bharat ke zer-e-qabza Jammu o Kashmir ke janubi khitte mein waqe wahid bade hospital mein cancer ke registered 3,000 mareez radiotherapy ki sahulat se mehroom hain, jis ke baais unhein ilaaj ke liye Srinagar ka safar karna parta hai.

Kashmir Media Service ke mutabiq GMC Islamabad ka mutalliqa shobah is waqt hospital ke andar ek tang aur arzi jagah par sirf chemotherapy aur takleef kam karne ki tibbi sahuliyat faraham kar raha hai.

Aalaat ki tajweez

Cancer ke ilaaj ke liye do manzila makhsoos imarat zer-e-tameer hai, taham khusoosi aalaat ke baghair wahan radiotherapy ki sahulat faraham nahin ki ja sakti.

Shobah radiation oncology ke sarbarah Dr Shahid Bashir Wani ne kaha ke GMC Islamabad ne zaroori aalaat ki kharidari ke liye hukumat ko pehle hi 40 crore rupay malliyat ki tajweez pesh kar di hai, aur yeh shobah usi waqt mukammal tor par faal ho sakta hai jab matlooba aalaat dastyab hon.

Is tajweez mein shuaon ke zariye ilaaj ke liye linear accelerator, radiotherapy ke liye CT simulator, PET scanner aur cancer ke ilaaj ki sahuliyat ko wusat dene ke liye deegar zaroori aalaat shamil hain. In aalaat ki lagat imarat ki tameer ke akhrajaat se alag hai.

Mareezon ki mushkilat

Fil haal Islamabad, Kulgam, Pulwama aur Shopian ke alawa Wadi Chenab aur Pir Panjal ke baaz ilaqon ke mareezon ko radiotherapy ke liye Srinagar mein SMHS ya Soura Institute of Medical Sciences jana parta hai.

Ek tibbi ahalkar ne bataya ke radiotherapy ke liye aksar chaar se paanch hafton tak hafte mein paanch din ilaaj karwana parta hai, jis ki wajah se baar baar safar karna mehnga aur jismani tor par intehai thaka dene wala amal ban jata hai. Unhon ne kaha ke bohat se mareezon ke liye is bojh ko musalsal bardasht karna mushkil hai.

Tibbi mahireen ke andaze ke mutabiq cancer ke 60 se 65 faisad mareezon ko ilaaj ke kisi na kisi marhale par radiotherapy ki zaroorat hoti hai.