Irani supreme leader Mojtaba Khamenei zinda magar shadeed zakhmi hain: Trump

Ek interview mein Trump ne kaha ke unhein nahin lagta ke naye Irani supreme leader halak ho chuke hain lekin agar aisa hai bhi to Irani hukkam bohat acha drama kar rahe hain kyunke Irani har mamle par hatmi manzoori lene ke liye supreme leader se dobara baat karne ka zikr karte rehte hain.

Sadr Trump ne kaha ke unhein yaqeen hai ke Iran ke supreme leader jism ke bayen janib bohat shadeed zakhmi hue hain.

Wazeh rahe ke 28 February ko Iran par American hamlon ke pehle din Mojtaba Khamenei shaheed hue the, us waqiye ke baad se Mojtaba Khamenei ko awami sath par nahin dekha gaya hai.

American sadr Donald Trump ne ek baar phir dawa kiya hai ke Iran ke khilaf America ka askari aur iqtisadi dabao kargar sabit ho raha hai.

Israeli media ke mutabiq qadamat pasand radio host Glenn Beck ko diye gaye ek interview mein sadr Trump ne kaha ke yeh tamam cheezein ek bohat bari kamyabi ki taraf barh rahi hain, hum bohat jald yahan ek bari kamyabi hasil karne wale hain.

American sadr ne is baat par bhi zor diya ke Strait of Hormuz ab dar haqeeqat mukammal tor par khuli hai, strait ab khuli hai, hum ab bohat se behri jahaz is strait se guzar rahe hain, tamam barudi surangein ab khatam kar di gayi hain.